سی پیک نا رداٹ 2027 اسکان 3428 میگاواٹ پن بجلی قومی گریڈ اٹی اوار مریک، کمامدار سی پیک اتھارٹی

اسلام آباد۔ 06 دسمبر (اے پی پی) ملک اٹی اولیتی بنداو تیا توانائی نا گرج آتے پورو کننگ کن چین پاکستان اقتصادی راہداری ڈٹ انا ارٹ میکو ریسہ نا رداٹ 2027اسکان 7 ارب 70 کروڑ ڈالر نا خڑچ آن 3 ہزار 428 میگاواٹ پن بجلی قومی گریڈ اٹی اوار مریک۔ سی پیک اتھارٹی نا کمامدارآک ’’اے پی پی‘‘ ءِ پاریر کہ 4 پن بجلی ڈٹ آتیان اسہ ارب 70 کروڑ ڈالر نا خڑچ آن تفنگوک آ اولیکو ڈٹ کروٹ ہائیڈروپاور پروجیکٹ آن 720 میگاواٹ اڑزآن بجلی 2022آ قومی گریڈ اٹی اوار مریک۔ 2 ارب ڈالر نا خڑچ آن تفنگوک آ ارٹ میکو ڈٹ سکی کناری ہائیڈرو پاور پروجیکٹ آن 884 میگاواٹ بجلی 2022اٹی قومی گریڈ اٹی اوار مریک۔ اسہ ارب 50 کروڑ ڈالر نا خڑچ آن تفنگوک آ مسٹ میکو ڈٹ آزاد پتن ہائیڈرو پاور پروجیکٹ آن 700 میگاواٹ بجلی 2026 اٹی قومی گریڈ اٹی اوار مریک۔ 2 ارب 50 کروڑ ڈالر نا خڑچ آن کوہالہ ہائیڈرو پاور پروجیکٹ آن چارمیکو ڈٹ 1124 میگاواٹ بجلی 2027 اٹی قومی گریڈ اٹی اوار مریک۔ داہر چار آ ڈٹ آتا پوروی آن اڑزآن پن بجلی دُوبریک ہراڑآن نئے بیرہ ملک ءِ بجلی نا گرج آتے پورو کننگ اٹ کمک رسینگک بلکن توانائی نا خواست و رسینگ اٹ توازن و درآمدی ایندھن آ سیبو کم مریک۔ داکان بیدس کلین اینڈ گرین انرجی نا فراوانی پک مریک و ہزار آ مخلوق ءِ روزگار نا موقع ملک۔ پاک چین اقتصادی راہداری نا رداٹ آزاد جموں و کشمیر اٹی 1124 میگاواٹ نا کوہالہ پن بجلی سہ فریقی ڈٹ آ سرسہبی اتون دستخط مسنے۔ دا وزیراعظم نا تعمیراتی بشخ و اوڑتون تعلقدار صنعت نا بحالی کن کمکار مریک۔ دا ڈٹ آن 5 ہزار مخلوق ءِ روزگار نا وارخواہی فراوان کننگک۔ 2 ارب 40 کروڑ ڈالرز نا زرکاری پاکستان و آزاد کشمیر اٹی آئی پی پیز نا ہرڈٹ اٹی غٹ آن بھلا زرکاری ءِ۔ دا ڈٹ آن پاکستان و آزاد کشمیر اٹی صارف آتے سالانہ 5 ارب یونٹ ساف و اڑزآن بجلی مہیا مریک۔ کوہالہ و آزاد پتن اٹ توانائی نا ڈٹ آتا رداٹ ہراڑے مچ آملک اٹی 4 ارب ڈالر نا زرکاری کن کسر آوار مریک ہموڑے مچ آملک اٹی روزگار نا پوسکن ءُ وارخواہی ہم دُوبریک۔ ہندا تونائی ڈٹ آتا کمک اٹ 1800 میگاواٹ بجلی ودی مننگ نا گمان ءِ وخت اس کہ مچ آ ملک اٹی 8 ہزار روزگار نا پوسکن ءُ وارخواہی دُوبریک۔ آزاد پتن پن بجلی ڈٹ چین پاکستان اقتصادی راہداری نا بشخ اسے ہراڑآ یک و نیم ارب ڈالر نا خڑچ بریک و داڑآن 7 سد میگاواٹ آن زیات بجلی ودی مریک دا ڈٹ اکن ایندھن درآمد کننگ نا گرج مفک و دا ملک ءِ اڑزآن و کچٹی آن پاک بجلی ودی کننگ اٹ کمک ایتک۔ دا ڈٹ دریائے جہلم آ واقع و 2026اٹی پورو مننگ نا گمان ءِ۔ خیبرپختونخوا ٹی 847 میگاواٹ نا سکھی کیناری پن بجلی ڈٹ آ دے و نن کاریم برجاءِ۔ دریائے کنہارآ تفنگوک آ دا ڈٹ آن 4 ہزار 250 ملازمت ودی مریک۔ ڈٹ انا بطریق احسن پوروی کن چینیک پبی خواری کننگ ءُ۔ شیڈول نا رداٹ، سکی کناری پن بجلی اُرانا تفنگ ءِ 2022نا ایسر اسکان ایسر اسکان سرکننگ ءِ۔ داپن بجلی گھر انا پوروی پاکستان نا صنعتی شونداری و زرگزرانی بحالی نا مون آ دننگ اٹ اہم ءُ کڑد اس ادا کیک۔