لاہور۔4دسمبر (اے پی پی): وزیر ءِ درئی کار شاہ محمود قریشی ءَ گوشت کہ پاکستان ءُ او آئی سی وزیر ءِ درئی کار کونسل ءِ 17 لس دیوان ءِ میزبانی ءَ کنت، دیوان 19 دسمبر ءَ اسلام آباد ءَ برجم دارگ بیت ایشی ءِ یک ٹیکی ایجنڈا اوگانستان ءَ بیت، آ یک شمبے ءَ گورنر گس لاہور ءَ پریس کانفرنس ءَ گشتانک کنگ ءَ اَت، اے موہ ءِ سر ءَ ترجمان درئی کارانی کارگس عاصم افتخار ھم ساڑی ات۔ وزیر ءِ درئی کار شاہ محمود قریشی ءَ گوشت کہ اوگانستان ءِ بابت ءَ دیوان ءِ بنیاتی مول ءُ مراد اوگانستان ءَ استیں نہ وشیں جاور ھال آنی پد ءَ میاں اوستمانی دگنیا ءَ را دلگوش کنائینگ لوٹ ایت۔ آئی ءَ گوشت کہ اگانستان ءِ اے ارزشتی ایں جیڈھ ءِ سر ءَ دلگوش دیگ نہ بوت گڈا آھودسا بنی آدمی ڈکال ءِ ودی بوت کنت۔ ھمے رنگ ءَ اگاں آھودا وھد ءِ سر ءَ ورد ن ءُ وراک ءِ بندوبست کنگ نہ بوت ءُ ٹوھیں ڈکال ءِ ودی بوت کنت۔ مئے کوشست انت کہ 19 دسمبر ءَ بوھوکیں لس دیوان ءَ دگنیا ِ ءِ دلگوش اوگانستان ءِ جیڈھ ءِ نیمگ ءَ کنائینگ بہ بیت ءُ اے باور کنائینگ بہ بیت کہ اوگانستان ءِ جاور ھال آں چہ یورپی یونین روبرکتی ملک آں ھوار ما درست آماچ باں، آئی ءَ گوشت کہ کانفرنس ءِ وسیلگ ءَ اے ھم منوگری کنگ بہ بیت کہ ما آسراتی ءَ را چتور موبالائز کت کناں ءُ دومی ملک اوگانستان ءِ چتور کمک کت کناں۔ میڈیا ءِ یک جستے ءِ پسو ءَ شاہ محمود قریشی ءَ گوشت کہ سیالکوٹ واکیہ ءِ سبب ءَ سک باز شرمندگ آں ایشی ءِ پسو ءَ مزن وزیر عمران خان ءَ ترندیں نوٹس زرتگ ءُ اے جیڈھ ءِ وت نگرانی ءَ کنگ ءِ حکم داتگ امیت انت کہ ما زوت یک نتیجگ ءِ سر ءَ سر باں کہ واکیہ ءِ پشت ءَ چئے راستی اِنت۔ آئی ءَ گوشت کہ سری لنکا ءِ ہائی کمیشن ءِ گوما رابطہ ءِ تہ ءَ آں آئی ءَ پاکستان ءِ لیکہ ءُ زوتیں گامگیج آناں ساڑاتگ۔ فیٹیف ءِ ھوالگ ءَ جست ءِ پسو ءَ آئی ءَ گوشت کہ اے جیڈھ ءِ سر ءَ گوستگیں 3 سال آنی تہ ءَ ھمینچوک کار بوتگ آیوکیں باندات ءَ ایشی ءِ درور رست نہ کنت۔ آئی ءَ گوشت کہ فیٹف ءِ باسک اے گپ ءِ منوک آں کہ پاکستان اے رد ءَ بے کساس دیمروئی کتگ ءُ منی نزیک ءَ 27 آئٹمز ءَ چہ 26.5 ءِ سر ءَ کار سرجم بوتگ۔ آئی ءَ گوشت کہ 2018 ءُ 2021 ءِ الیکشن پلان ءِ سر ءَ دیمروئی ءَ آئی ءَ گوشت کہ منی نگاہ ءَ پاکستان ءَ گرے لسٹ ءَ ھوار کنگ ءَ اچ جواز نیست بلے لستیں راج فیٹف ءَ را کارمرز کنگ لوٹ ایت ءُ وتی چیز آناں منارینگ لوٹ ایت ءُ بھارت ا ے رد ءَ گیشاں چہ گیش کرد پیلو کنت۔ آئی ءَ گوشت کہ امیت انت کہ فیٹف ءِ آیوکیں دیوان ءَ پاکستان ءِ نیمگ ءَ چہ کتگیں دیمروئی کار آناں دیم ءَ ایر کنان ءَ پاکستان ءَ را گرے لسٹ ءَ چہ در کنگ لوٹ ایت ءُ اگاں پاکستان ءَ را گرے لسٹ ءَ ایر کنگ بیت گڈا اے فورم وتی دل یکیمی ءَ را آماچ کنت، گورنر پنجاپ چوہدری سرور ءِ ھوالگ ءَ جست ءِ پسو ءَ شاہ محمود قریشی ءَ گوشت کہ آ اچ جاہ ءَ نہ روگ ءَ انت درستاں وت سرئیں گپ انت۔
