لاہور۔ 03 دسمبر (اے پی پی) گورنر پنجاب چوہدری محمد سرور دورہ برطانیہ ٹی برطانوی پارلیمنٹ نا اسپیکر لنڈسے ہولی تون اوڑدہی کرے و اوغانستان ، ڈیہہ نا حالیت و پاک برطانیہ تعلقداری تون اوار ایلو امور آ گپ وتران کننگا وخت اس کہ اسپیکر لنڈ سے ہولی نا کنڈآن امن و دہشت گردی نا چٹفنگ کن پاکستانی گام گیج آتا ستاءِ کننگا۔ گورنر ہاؤس لاہور آن جاری اعلامیہ نا رداٹ گورنر پنجاب چوہدری محمد سرور دورہ برطانیہ ٹی پاکستان اٹی برطانوی ہائی کمشنر معظم احمد خان و باسک برطانوی پارلیمنٹ افضل خان تون اوار برطانوی پارلیمنٹ اٹ اسپیکر لنڈ سے ہولی اتون اوڑدہی کرے ہراٹی پاک برطانیہ تعلقداری آن بیدس اوغان امن عمل اٹ پاکستان نا کڑد، اوغانستان نا ساڑی حالیت اتون اوار ایلو باندات نا بارواٹ گپ وتران کننگا وخت اس کہ گورنر پنجاب اوغان امن عمل اٹ پاکستانی کڑد و اوغان الس ءِ مون تروک ویل آتا بارواٹ ہم اسپیکر ءِ پارے۔ گورنر پنجاب چوہدری محمد سرور اوڑدہی ٹی پارے کہ اوغانستان اٹی انسانیت ءِ نیزگاری و بے روزگاری اتون اوار اوار جان جوڑی کون آ بنداوی آسراتی تا فراوانی نا بابت بدترین حالیت اتون مون تروئی تمنگ ءِ، جہانی میڈیا نا رداٹ اوغانستان اٹی نیمہ غان زیات آبادی ءِ کُننگ نا گڑا ہم دُوبفننگ ءِ ہنداخاطرآن اوغانستان ءِ پین بھسکاری اسے آن بچفنگ کن دنیا دا غٹ حالیت آتا نوٹس ءِ ہلسا اوغانستان اٹ انسانی زند آتے بچفنگ و امن کن مون آ برسا تینا زمواری تے پورو کے۔گورنرچوہدری محمد سرور پارے کہ دنیا ءِ داہم ہروئی مریک کہ او ہرازموارآک ءُ ہرا اوغانستان اٹ دہشت گردی تون اوار ایلو کارروائی تا کمک اٹ ہموڑے امن ءِ بھس کننگ نا سازش کننگ ءُ، داوڑنا زموار آتا برخلاف مچ آ دنیا ءِ اسہ پنہ غا برسا ایکشن ہلوئی مریک تانکہ داوڑنا زموارآتا عزم آتے بے سہب کننگ مرے، اوغان سرکڑدہ غاتیان ہم اومیت ءِ کہ او اوغانستان اٹ زالبول آتون اوار غٹ ءِ بنداوی انسانی حق انا فراوانی نا بابت غٹ گام گیج آتے پک کیرہ۔ چوہدری محمد سرور پارے کہ داہیت اٹی ہچ ءُ شک اس اف کہ وزیراعظم عمران خان نا کماشی ٹی پاکستان بیرہ اوغانستان اٹی آخا بلکن مچ آ ڈیہہ ٹی امن کن تینا پبی کڑد ءِ ادا کرینے، امن و دہشت گردی نا چٹفنگ کن پاکستان ہراقربانی تے تسنے اوہم مچ آ دنیا کن اسہ درور اسے ءُ، پاکستان اینو ہم امن تون و دہشت گردی نا برخلاف سلوک ءِ، امن کن پاکستان مہالو ہم قربانی تسنے و آخبت ہم ایتک۔
