اسلام آباد۔ 03 دسمبر (اے پی پی) خصوصی کمکار جان جوڑی ڈاکٹر فیصل سلطان ڈریپ انا نیشنل کنٹرول لیبارٹری نا دورہ ءِ کرے۔ انچارج نیشنل کنٹرول لیبارٹری ڈاکٹر فیصل سلطان ءِ لیب انا کارکڑد و مون تروک چیلنج آتا بارواٹ سرجم حوال تس۔ دا لیبارٹری نا مسخت ویکسین و ایلو ہمو غٹ دوائی ہرا بیالوجیکل سورس اٹ جوڑ مریرہ اوفتا آب ءِ ہُننگ نا ءِ تانکہ الس ءِ رکھ و آب اٹ دوائی دُوبرے۔ ڈاکٹر فیصل سلطان لیب انا عملہ نا گچین کارکڑد انا ستاءِ کرساپارے کہ کنے بھاز خوشی مسنے کہ نم لیب ءِ چنکو وخت اسے ٹی فعال کرینورے و دانا اپ گریڈیشن نا کاریم ہم برجاءِ۔ اومستی پارے کہ نیشنل کنٹرول لیبارٹری ءِ جہانی آب انا رداٹ جوڑ کننگ کن سنبرینگوک اُن و دانا کارکڑد ءِ پین گچین کننگ و پورو وڑاٹ فعال کننگ غٹ تر وسیلہ غاتے کاریم اٹ اتنگ اُن، وزیراعظم عمران خان نا وژن نا رداٹ جان جوڑی نا بشخ اٹی اصلاحات نا چرجوئی برجاءِ و ادارہ غاتا کارکڑد ءِ پین گچین کننگ کن گچین گام گیج آتے پک کننگ اُن۔ ڈاکٹر فیصل سلطان مستی پارے کہ تدوک آ دے تیٹی کراچی ٹی سینٹرل ڈرگ ٹیسٹنگ لیبارٹری نا دورہ ءِ کرینٹ ، ڈریپ اسہ بے مٹ ءُ و اسٹیٹ آف دی آرٹ لیبارٹری اس جوڑ کرینے، ڈریپ اٹ بھلو کچ اسے آ اصلاحات کننگ انگ ءِ و ہراتم ادارہ نا کارکڑد گچین مریک تو الس نا پت ہم ودک کہ دوائی تے ریگولیٹ کروک آ ادارہ الس نا گچینی و آسودہی کن پبی کڑد ادا کننگ ءِ۔
