اسلام آباد۔ 03 دسمبر (اے پی پی) صدر مملکت ڈاکٹر عارف علوی معذور بندغ آتا خاص خیال ءِ تخنگ نا گرج آ زور شاغسا پارینے کہ اوفتے راج انا فائدہ ئی شاری جوڑ کننگ کن تعلیم و ملازمت آتیٹی ایلو شاری تا بریبر و سازگار وارخواہی فراوان کننگے، معذور بندغ آتے مالی وڑاٹ وتواجہ جوڑ کننگ و اوفتے اوفتا نت تیا سلفنگ کن کسب و تربیت فراوان کننگ نا گرج ءِ، احساس پروگرام اٹ 4 لکھ خصوصی بندغ آتے رجسٹرڈ کننگانے۔ داخیال آتا درشانی ءِ او جمعہ نادے آ افراد معذوربندغ آتا جہانی دے انا بابت ایوان صدر اٹی دود آن تران کرسا کرے ہرانا سرحال کورونا نا دین آن پد دنیا ٹی معذور بندغ آتا اوار مننگ، رسینگ و پائیدار یت نا بابت سرکڑدہ ئی و شریداری ئس۔ صدر مملکت ڈاکٹر عارف علوی پارے کہ خصوصی چناتا بابت ننے تینا زمواری تے سمجھوئی مریک، خصوصی چناک قومی دنگ اٹ بایدے اوار مریر، معذوربندغ آتا چار وڑ ءُ، اوفتے ٹی سماعت، بصارت، لس جونی معذوری و ذہنی معذوری اوار ءُ، سماعت، بصارت و لس جونی معذور بندغ آک ایلو شاری تا بریبر ذہین مریرہ۔ اوپارے کہ خصوصی بندغ آتا باندات آ راج اٹ بایدے گپ وتران مرے، راج انا زمواری ءِ کہ اوفتے کن خاص کوشست کے و اوفتے آسراتی فراوان کے۔ اوپارے کہ مچ آ دنیا ٹی 10 آن 12 درسد بندغ خصوصی مریرہ۔ اوپارے کہ بازار و السی ہند آتیا معذوربندغ آتےکن ریمپ و ایلوآسراتی تے فراوان کننگے، ہرجاگہ غا خصوصی بندغ آتے کن ریمپ بایدے جوڑ کننگے، داسہ ہر ماڑی ٹی ریمپ المی جوڑ کروئی تمک، اسلام آباد اٹی سی ڈی اے بازار تیٹی خصوصی بندغ آتیکن ریمپ جوڑ کرینے۔ صدر مملکت پارے کہ ہراخصوصی بندغ تعلیم دوئی کننگ کتنے اودے تربیت فراوان کننگ انگ ءِ، استاد آتے خصوصی چناتا تعلیم نا بابت بایدے تربیت فراوان کننگے، خصوصی چناتے تعلیمی ادارہ غاتے ٹی داخلہ ہلنگ آن توننگ مفک، ہر اسکول اٹ خصوصی چناتیکن استاد بایدے ساڑی مرے۔ اوپارے کہ کراچی ٹی سماعت آن محروم بندغ آک ریسٹورنٹ آتے چلیفنگ ءُ، این جی اوک خصوصی بندغ آتے تربیت فراوان کیر۔ اوپارے کہ خصوصی بندغ آتے ملازمت نا وارخواہی ہم بایدے فراوان کننگے۔ صدر مملکت پارے کہ گورنر اسٹیٹ بینک خصوصی بندغ آتیکن خاص گام گیج کرے، بینک آتیٹی خصوصی بندغ آتیکن ریمپ جوڑ کننگانے و خصوصی کاؤنٹر ہم جوڑ کننگانے۔ اوپارے کہ احساس پروگرام اٹ 4 لکھ خصوصی بندغ آتے رجسٹرڈ کننگانے و اوفتے 2 ہزار روپئی ماہانہ وظیفہ تننگ انگ ءِ، معذور بندغ آتے اوفتے اوفتا نت تیا سلفنگ و راج انا فائدہ شاری جوڑ کننگ ننا غٹ انا اجتماعی زمواری ءِ۔ اوپارے کہ پوسکن آ مردم شماری آن معذور بندغ آتا سہی حساب وکتاب مون آ بریک و داڑآن گچین پالیسی سازی ٹی کمک رسینگک۔ بنجائی وزیر انسانی حق ڈاکٹر شیریں مزاری تینا تران اٹی پارے کہ دادے ءِ اڈتننگ نا مسخت معذوربندغ آتا حق ءِ تالان کننگ و دا حق انا فراوانی نا کنڈآ دنیا و حکومت آتا چکار ءِ کرفنگ ءِ، حکومت آتا زمواری ءِ کہ او خصوصی بندغ آتے بریبر وارخواہی و سازگار چاگڑد اس فراوان کننگ کن گام گیج و کانود سازی کیر، ساڑی حکومت معذوربندغ آتے اوفتا حق تننگ کن کانودسازی کرینے، اوفتے کن ملازمت آتیٹی کوٹہ جتا ءِ، ہرا ادارہ دا کوٹہ غا عمل کپننگ ءِ اوفتا فہرست ءِ مرتب کرینن، خصوصی بندغ آتیکن ملازمت آتیٹی کوٹہ ءِ ودفنگے۔ اوپارے کہ وزارت انسانی حق خصوصی بندغ آتا معلومداری اسکان رسینگ و آسراتی کن موبائل ایپ اس جاری کرینے ہرانا کمک اٹ او آن لائن درخواست تننگ کیرہ، ون ونڈو آپریشن کن چک شہزاد اٹی ون ونڈو آپریشن سینٹر اس جوڑ کننگانے، اسلام آباد نا سرکاری و پرائیویٹ اسکول آتیٹی خصوصی بندغ آتا تعلیم نا بابت بنجائی وزارت تعلیم تون معاہدہ غا دستخط کرینے، خصوصی بندغ آتا برخلاف سائبر کرائم و اُرائی بیدادی نا توننگ کن کاریم کننگ اُن، خصوصی بندغ آتے لس شاری تا بریبر حق انا فراوانی ءِ پک کننگ کن کوشست کننگ اُن۔ سی بی ایم نا کنٹری ڈائریکٹر سید محمد علی شاہ پارے کہ راج انا زمواری ءِ کہ خصوصی بندغ آتا غٹ بشخ آتیٹی بریبر شرکت ءِ پک کے۔
