اسلام آباد۔ 03دسمبر (اے پی پی) وزیراعظم عمران خان پولیو تور اکن صوبائی و ضلعی حکومت آتا کوشست آتے خراج تحسین پیش کرسا پارینے کہ مرمرانگا ومشکل علاقہ غاتسکان سرمروک آ پولیو ورکرآک قومی خذمت سرتننگ ءُ، گچین کارکڑد نشان تروک آ پولیو ورکرآتیکن انعام تننگ نا پلان اس مرتب کننگے، ننے غٹ ءِ اواری اٹ پولیو ءِ چٹفوئی ءِ، کورونا نا پوسکن آ وڑ اومیکرون نا رداٹ ویکسی نیشن مہم ءِ پین ترند کننگے۔ داخیال آتا درشانی ءِ او جمعہ نادے آ تینا کماشی ٹی انسداد پولیو مہم نا بابت جاچ دیوان آن تران کرسا کرے۔ دیوان اٹی وزیراعظم نا خصوصی کمکار قومی جان جوڑی ڈاکٹر فیصل سلطان ، پارلیمانی سیکرٹری جان جوڑی ڈاکٹر نوشین حامد و بڑزکو عہدیدار آک بشخ ہلکر وخت اس کہ پنجاب، سندھ، خیبرپختونخوا و بلوچستان نا چیف سیکرٹریز و 30 آن زیات ضلع غاتا ڈپٹی کمشنر آک ویڈیو لنک انا کمک اٹ بشخ ہلکر۔ دیوان اٹی وزیراعظم ءِ پاننگاکہ جہانی ادارہ حکومت پاکستان نا کورونا و پولیو آن بچفنگ کن گچین گام گیج آتا معترف ءِ۔ خیبرپختونخوا نا سویلی ضلع، بلوچستان نا ضلع کوئٹہ، قلعہ عبداللہ و پشین، و سندھ اٹی حیدر آباد و کراچی ٹی خراب انگا دیر انا کمک اٹ پولیو نا تالانی نا خطرہ زیات ءِ۔ داوخت آ وزیراعظم صوبائی و ضلعی حکومت آتا انسداد پولیوکن کوشست آتیا خراج تحسین پیش کرسا پارے کہ پولیو ورکرز ہرامرمر انگا و مشککل علاقہ غاتسکان سرمریرہ قومی خذمت سرتننگ ءُ ہراڑکن او خصوصی سفت نا حقدار ءُ۔ اوپارت کرے کہ گچین کارکڑد نشان تروک آ پولیو ورکرآتیکن انعام تننگ نا پلان اس مرتب کننگے۔ چیف سیکرٹریز و ڈپٹی کمشنر آتے انسداد پولیو گام گیج آتے پین گچین کننگے۔ وزیراعظم پارے کہ کم منتقلی والا سیزن پولیو دین انا چٹفنگ کن جوان ءُ وخت اسے و ننے غٹ ءِ اواری اٹ پولیو ءِ چٹفوئی ءِ۔ ضلعی انتظامیہ پولیو ورکرز آتا زیزاریفنگ یا اوفتیا جلہو آتا حالیت اٹ کانودی کارروائی نا زمواری ءِ ہلے۔ چناتا متعدی مرض آتیان بچفنگ نا ٹیکہ نا عمومی مہم و انسداد پولیو ءِ اوار اوار چلیفنگے۔ اوپارے کہ کورونا دین انا پوسکن آ وڑ اومیکرون نا رداٹ کورونا نا برخلاف ویکسی نیشن مہم ءِ پین ودفنگے۔
