راولپنڈی۔ 02 دسمبر (اے پی پی) بنجائی وزیر داخلہ شیخ رشید احمد پارینے کہ شہداء پولیس پیکج نا ادائیگی وزیراعظم عمران خان نا اولیت آتیٹی اوار ءِ، راج زمواری نا درشانی ءِ کے و پولیس آ بے سوب تنقید کننگپ، ماڑی تے بڑز کننگ آن آخا بلکن تینا لائخی تیان درکار نتیجہ غاتے دوئی کننگ مریک، شار انا آبادی نا ودنگ نا سوب آن اسلام آباد پولیس فورس اٹی ہم ودکی کننگک۔ داخیال آتا درشانی ءِ شیخ رشید احمد پنچ شنبے نادے آ اسلام آباد اٹی نیشنل پولیس بیورو نا کنڈآن نیشنل شوٹنگ کمپٹیشن نا دود آن تران کرسا کرے۔ بنجائی وزیر پارے کہ وزیراعظم عمران خان آن خواست کرینن کہ اولیتی بنداو آ شہداپیکج نا زر تس نا بناءِ کننگے۔ اوپارے کہ راج تینا زمواری نا درشانی ءِ کے و بے سوب پولیس ءِ تنقید نا شست کننگپ۔ اوپارے کہ ماڑی تے بڑز کننگ آن آخا بلکن لائخی تیان درکار نتیجہ غاتے دوئی کننگ کینہ۔ شیخ رشید احمد پارے کہ ملکی آبادی ٹی ترندی آن ودکی مننگ ءِ، 2013ٹی 8 کروڑ ووٹرآتا اندراج ئس ہرا، 2018ٹی دہ کروڑ آن زیات و داتم اسکان 12 کروڑ دہ لکھ آن زیات مسنے۔ آبادی نا ودنگ تون پولیس نا زمواریک ہم ودسا ہِننگ ءُ و اسلام آباد پولیس فورس اٹی اِرا ہزار نفری نا ودکی کننگک۔
