کوئٹہ۔ 02 دسمبر (اے پی پی) تحریک انصاف بلوچستان زالبول ونگ انا راہشون زولیخہ عزیز مندوخیل کیہی سال آن بلوچستان آن بند بولان میل کوئٹہ ٹو کراچی نا بحالی ءِ ستاکڑزوک گوندانے ہراڈپٹی اسپیکر قاسم خان سوری نا کوشست آتیان بحال مسنے بولان میل انا بحالی نا سوب آن نئے بیرہ الس ءِ اڑزآن و آسان سفری آسراتی دوئی مس بلکن ریلوائی تون گنڈوک کیہی ملازم و کاروباری بندغ آتا روزگار ہم بحال مسنے۔ بھلو وخت اسے آن الس و ریلوائی ملازم آتا خواست ئس کہ بولان میل ءِ بحال کننگے، تینا بیان اٹی پاکستان تحریک انصاف نا راہشون زلیخہ عزیز مندوخیل پارے کہ ڈپٹی اسپیکر قاسم خان سوری السی خواست و السی گرج ءِ مون آ تخسا بنجائی حکومت نا چکار ءِ بولان میل ٹرین نا بحال کننگ نا کنڈآ کرفے ہراڑآن بولان میل بحال مس، بولان میل ٹرین بحال مننگ آن بلوچستان نا ویران ریلوائی اسٹیشنک دُوارہ بحال مسنو۔ ڈپٹی اسپیکر الس ءِ باور کرفے کہ بلوچستان آن بند ایلو ریل تے ہم او زوت بحال کرفک ہراڑآن الس زوت فائدہ ہرفک۔ السی وونٹ آتے اٹ بروک تحریک انصاف نا نمائندہ مدام نیزگار الس نا آسراتی و آسانی کن گام گیج آتیٹی لگوک مسنو و آخبت ہم لگوک مریرہ۔ اوپارے کہ بولان میل انا بحالی ڈپٹی اسپیکر قاسم سوری نا کوشست آتا نتیجہ ءِ۔
