اسلام آباد۔ 02 دسمبر (اے پی پی) وزیر مملکت حوالکاری و شینکاری فرخ حبیب پارینے کہ مستین نا حکمران تے اوورسیز پاکستانی تا ترسیلات زر اتون تو پیار ئس ولے او اوفتے وونٹ انا حق تننگ نا برخلاف ئسر۔ داخیال آتا درشانی ءِ او پی ٹی آئی برطانیہ نا صدر عبدالستار رانا و سینئر نائب صدر ملک عمران خلیل ئسک اوڑدہی ٹی کریر ہرافک پنچ شنبے نادے آ وزیر مملکت تون اوڑدہی کریر۔ اوڑدہی ٹی اوورسیز پاکستانی تا ویل آتے ایسر، پیشن نا ملک آتے ٹی پاکستانی مشن آتا کڑد و ایلو امور آ گپ وتران کننگا۔ پی ٹی آئی برطانیہ نا عہدیدارآک پیشن نا ملک رہینگوک آ پاکستانی تے وونٹ انا حق تننگ آ وزیراعظم عمران خان و اونا ٹیم انا منت واری ءِ ہرفیر۔ وزیر مملکت پارے کہ مستین اٹ غٹ حکومت آتے اوورسیز پاکستانی تا ترسیلات زر اتون پیار ئس ولے اواوفتے وونٹ انا حق تننگ نا برخلاف ئسر، اوپارے کہ وزیراعظم عمران خان 90 لکھ اوورسیز پاکستانی تتون گچین کاری تیان مست ہرا قول ءِ کریسس اودے پورو کرسا نشان تس۔ فرخ حبیب پارے کہ وزیراعظم عمران خان برطانیہ تون اوار مچ آ دنیا ٹی جوڑ پاکستانی مشن تے پیدوار پارت کرینے کہ پاکستان نا ویل آتے دمدستی ایسر و ہرممکن آسراتی فراوان کیر، عبدالستار رانا پارے کہ پیشن نا ملک رہینگوک پاکستانی تیکن روشن ڈیجیٹل اکاؤنٹ، اپنا گھر اسکیم کون آ پروگرام تا بناآ پی ٹی آئی حکومت نا منت وار اُن۔ ملک عمران خلیل پارے کہ بروک آ گچین کاری تیٹی مچ آ دنیا ٹی رہینگوک آ پاکستانیک عمران خان ءِ وونٹ ایترہ، پی ٹی آئی برطانیہ نا سرکڑدہ غاک اوورسیز پاکستانی تیکن پاور آف اٹارنی نا اجراکن آٹومیشن نظام اس درستی راستی کرفنگ آ وزیراعظم نا منت واری ءِ ہرفیر۔ اوفک پاریر کہ پاور آف اٹارنی نا آن لائن تصدیق و اجراآن ہزار آ سمندر پار پاکستانی تے فائدہ مریک، متکن آ کرپٹ نظام آن فائدہ ہرفوک آ ک ملک اٹی بدلی خواتورہ۔
