اسلام آباد۔ 02 دسمبر (اے پی پی) چیئرمین سینیٹ محمد صادق سنجرانی متحدہ عرب امارات نا 50 می سال دے آ اونا سرکڑدہ و الس ءِ پاکستان نا پارلیمان، حکومت و الس نا کنڈآن است انا حب اٹ مبارکبادی تسنے۔ چیئرمین سینیٹ پارے کہ متحدہ عرب امارات نا سیاسی سرکڑدہ غاک سیوت، شونداری و شونہالی نا بے مٹ مزل آتے طے کرینو، پاکستان یواے ای نا الس نا خوشی تیٹی شریک ءِ۔ اوپارے کہ ڈیہہ نا شونداری، زرگزرانی شونہالی و امن نا مون آ دننگ ننا اسیجائی وژن ءِ، پاکستان و متحدہ عرب امارات نا برادرانہ تعلقداری کثیر الجہتی کمکاری آ تالان ءُ، ایلمی و پت انا رشتہ اسیجائی مذہبی و دودوربیدگی رابطہ غاتا سوب پین سوگو مننگ ءِ۔ چیئرمین سینیٹ پارے کہ جہانی فورم تیا بے مٹ کمکاری پاکستان و متحدہ عرب امارات نا نیام اٹ پت و شرف ءِ پاش کیک، ننے دا تعلقداری و ایلمی نا فضاءِ پین سوگوی تننگ کن بڑزکو کہول آ ڈل آتا ہن و بر اٹی ترندی اتنگ و واپاری سرجزآتے پین ودفنگ آ چکار کروئی مریک۔ محمد صادق سنجرانی پارے کہ زرکاری و کاروباری نقل و حمل نا کمک اٹ ہڑتوم آ کنڈآتا الس ءِ پین خڑک اتنگ مریک۔ اوپارے کہ پاکستان و متحدہ عرب امارات نا سنگتی وخت انا ہر امتحان آ پورو سلیس، متحدہ عرب امارات و پاکستان کن پوسکن آ سرسہبی و شونداری کن دعا کینہ۔ پاکستان۔متحدہ عرب امارات سنگتی زندہ باد۔
