ایبٹ آباد۔ 02 دسمبر (اے پی پی) صدر مملکت ڈاکٹر عارف علوی قوم تا شونداری کن چناتا تعلیم و تربیت و نظم و ضبط ءِ المی گوندسا طالب علم آتیا زور شاغانے کہ او تینا تہذیب و قدر انا بارواٹ آگاہی دوئی کیر و قائد اعظم نا فرمان ’’ایمان، سیوت و تنظیم ‘‘ نا عملی عکس اس مریر، پوسکن آ دور اٹی علم انا دوئی کننگ نا ذریعہ بدل مسنے، کورونا نا دین آن پد جان جوڑی و تعلیم نا فراوانی و کاریم کننگ نا وڑاٹ ہم پوسکن ءُ وڑوڈول اس درستی راستی مسنے، قومک قدرتی وسیلہ غاتیان آخا ، ذہنی استعداد آن جوڑ مریرہ، ذہن سازی آن پاکستانی قوم عظیم جوڑ مریک، پاکستان نا شونداری کن اسہ ایلو نا نت تے چکنگ نا جاگہ غا ننے سیوت نا درشانی ءِ کروئی ءِ۔ پنچ شنبے نادے آ داڑے آرمی برن کالج اٹ لمہ و باوہ دے انا سالانہ دود آن تران کرسا صدر مملکت پارے کہ تعلیم تون اوار اوار جان جوڑ ہم نصابی سرجز و گوازی نا وارخواہی ہم بایدے فراوان کننگے، داسرجزآک طالب علم آتا زند اٹ توازن ودی و اوفتا کڑد سازی ءِ کیرہ۔ اوپارے کہ ای تینا استاد آتا بھاز قدر ءِ کیوہ، استاد بھاز بھلو نعمت اس مریک، درو ای چناتیا جونی سزانا برخلاف کانود آ دستخط کریٹ۔ بدل مروک آ زمانہ ٹی علم دوئی کننگ مست آن زیات آسان مسنے۔ مستین اٹ استاد آک علم دوئی کننگ نا ذریعہ ئسر، اسلامی تاریخ و حدیث نا علم ہم استاد آتا کمک اٹ تالان مس، داسہ الیکٹرانک دنیا ٹی علم انا ڈیجیٹل ذریعہ ساڑی ءِ۔ پوسکن آ چین اخبار آتا جاگہ غا الیکٹرانک ذریعہ غان فائدہ ہرفنگ ءُ۔ علم انا دوئی کننگ نا وڑوڈول و ذریعہ بدل مسنے۔ وخت اتون اسکول آتیا بھاریم ودک و آن لائن تعلیم نا گرج مریک۔ روایتی طرز تعلیم نا جاگہ ءِ پوسکن آ وڑوڈول آک ہلنگ ءُ۔ کوویڈ۔ 19 اٹی جان جوڑی و تعلیم نا نظام ہم بدل مسنے۔ بھازانگا کمپنیک تینا ملازم آتے اُراغا ن کاریم کننگ نا وارخواہی فراوان کننگ ءُ۔ صدر مملکت پارے کہ اُرا و اسکول ہر چنانا تربیت اٹ اہم ءُ کڑد اس ادا کیک۔ ہر ملک انا شونداری کن چناتا تربیت المی ءِ۔
