اسلام آباد۔ 02 دسمبر (اے پی پی) وزیراعظم عمران خان پارینے کہ حکومت لس بندغءِ زیات آن زیات ریلیف تننگ کن ہرممکن گام گیج کننگ ءِ، کبینی نا سوب آن نیزگار انگا مخلوق ءِ کنوئی آ گڑاتیا سبسڈی تننگ اُن، زیات آن زیات نیزگار انگا اُراتے فائدہ تننگ کن رجسٹریشن نا عمل ءِ ترند کننگے۔ اوداخیال آتا درشانی ءِ پنچ شنبے نادے آ احساس راشن پروگرام نا بابت دیوان نا کماشی ءِ کرسا کرے۔ دیوان اٹی وزیراعظم نا خصوصی کمکار تخفیف نیزگاری سینیٹر ڈاکٹر ثانیہ نشتر، سلاہکار خزانہ شوکت فیاض ترین، وزیراعلیٰ گلگت بلتستان خالد خورشید، وزیراعظم نا خصوصی کمکار سیاسی امور ڈاکٹر شہباز گل تون اوار تعلقدار سینئر آفیسر آک بشخ ہلکر وخت اس کہ وزیراعلیٰ پنجاب سردار عثمان بزدار، وزیراعلیٰ خیبرپختونخوا محمود خان، وزیراعظم آزاد کشمیر سردار عبدالقیوم خان نیازی ئسک ویڈیو لنک انا کمک اٹ دیوان اٹ بشخ ہلکر۔ داوخت آ وزیراعظم پارے کہ حکومت لس بندغ ءِ زیات آن زیات ریلیف تننگ کن ہرممکن گام گیج کننگ ءِ۔ اوپارے کہ کبینی نا سوب آن مخلوق نا تکلیف آتے پہہ مرینہ۔ نن نیزگار انگا مخلوق ءِ المی آ گڑاتیا سبسڈی تننگ اُن۔ داکان مست وزیراعظم ءِ پاننگاکہ احساس راشن پروگرام نا رداٹ ملک انا ہمو 2 کروڑ اُراتے نُت، سی و دال آتیا اسہ ہزار روپئی نا ماہانہ سبسڈی تننگ انگ ءِ ہرافتا ماہانہ کٹیا 50،000روپئی آن کم ءِ۔ وزیراعظم ءِ حوال اٹی پاننگا کہ داپروگرام 15 دسمبر آن مچ آ ملک اٹی بناکننگک ۔ پروگرام نا رداٹ کریانہ اسٹورز نا رجسٹریشن برجاءِ و داتم اسکان 15000 آن زیات کریانہ اسٹورز رجسٹرڈ مسنو۔ وزیراعظم تعلقدار کمامدارآتے پارت کرے کہ ملک اٹی زیات آن زیات نیزگار اُراتے فائدہ تننگ کن رجسٹریشن نا عمل ءِ ترند کننگے۔ اوداچرجوئی ٹی کریانہ اسٹورز و ممکنہ فائدہ ہرفوک آتے ٹی بیداری ودی کننگ کن ضلعی حکومت نا کمامدارآتے ہم متحرک کننگ نا پارت کرے۔
