اسلام آباد۔2دسمبر (اے پی پی): اولی زالبول بیگم ثمینہ عارف علوی ءَ گشتگ کہ ملک ءَ سینگ ءِ وروکی ءَ چہ زالبولانی مرگ ءَ را کم کنگ ءِ ھاترءَ سرجمیں سرپدی مہم ء ُ اثر مندیں گامگیج المی اِنت، وت وتی تپاسگ ءَ چہ ہزاراں زند رکینگ بوت کنت، اے نادارہی ءِ گر ء ُ دار ءِ ھاترءَ پرہیزگی رھبنداں ہوار زوت ء ُ ٌپہ وہد پجارگ المی اِنت، کمیں آسراتی بوہگء َ ابید ہم کینسر وڑیں تُرسناکیں نادراہی ءَ گوں جنگ کنگءِ وس ء ُ واک اَست، نادراہ جاہ، حال رسانک ء ُ وانگ ء ُ زانگی ادارگ سرپدی دیئگ ءَ حکومت ءَ گوں ہمراہ داری بہ کن اَت۔ اے ھیالانی درشانی آئی ءَ پنچ شمبے ءِ روچءَ شفاءانٹرنیشنل نادراہ جاہ ءَ سینگ ءِ وروکی ءِ ہوالگ ء َ برجم داشتگیں مراگش ءَ گوں تران کنان ءَ کتگ۔ آئی ءَ گشتگ کہ ایندگہ ملک آں چہ پاکستان ءَ سینگ ءِ وروکی ءَ چہ مرگ گیش بیت۔ امیچو زوت نادراہی ءِ پجار بیت امیچو گیش جان رکگ بیت۔ آئی ءَ گشتگ کہ شفاءانٹرنیشنل نادراہ ءِ انتظامیہ ءِ منت وار اَں کہ آ سینگ ءِ وروکی ءَ چہ سرپدی مہم ءَ مئے گوما کتگ ء ُ گوستگیں بازیں سالاں چہ پہ اے کاز ءِ ھاترءَ ازمت کنگ ءَ اَنت۔
