اسلام آباد۔1دسمبر (اے پی پی): مزن وزیر عمران خان ءَ پنت ءُ شون کتگ کہ گندم، یوریا، شکر، آرت ءُ پیٹرول ءِ اسمگلنگ ءُ منی لانڈرنگ ءِ گر ءُ دار ءِ واستہ زوتیں گامگیج کنگ بہ بیت۔ اے پنت ءُ شون آئی ءَ چار شمبے ءَ اسمگلنگ ءُ منی لانڈرنگ ءِ گر ءُ دار ءِ گامگیج ءِ ھوالگ ءَ چار ءُ تپاسی دیوان ءِ سروکی ءِ ساھت ءَ گوشت، دیوان ءَ بنجاھی وزیر شیخ رشید، اسد عمر، خسرو بختیار، سید فخر امام، حماد اظہر، مشیر ءِ ھزانگ شوکت ترین، مشیر تجارت عبدالرزاق داؤد، ھاسیں کمکار ڈاکٹر شہباز گل، گورنر سٹیٹ بنک، چیئرمین ایف بی آر ءَ ابید کلانہ ایں سول ءُ اردی کارندہ ھوار اتنت۔ مزن وزیر ءَ گوشت کہ اسمگلنگ ءِ سبب ءَ ملک ءِ معیشت ءَ را باز تاوان رستگ۔ آئی ءَ پنت ءُ شون کت کہ گندم، یوریا، شکر، آرت ءُ پیٹرول ءِ اسمگلنگ ءُ منی لانڈرنگ ءِ گر ءُ دارگ ءِ واستہ زوتیں گامگیج کنگ بہ بیت۔ مزن وزیر ءَ گوشت کہ حکومت ءِ اے گامگیج آنی مول ءُ مراد لس مردم ءَ را ریلیف پجاری کنگ انت۔ ضلوریگیں سامان آنی نیاد ءِ تہ ءَ پرک اسمگلنگ ءِ سبب ءَ گیش بیت۔ اسمگلنگ ءِ سبب ءَ وت جوڑ کتگیں ڈکال ءِ پیداک بیت ھمے سبب ءَ نیاد ود انت، دیوان ءَ را گوشگ بوت کہ ایف آئی اے ءَ ڈالر ءِ منی لانڈرنگ ءُ گیر کانودی ہولڈنگ ءِ ھلاپ ءَ پراھ ءُ شاھیگانیں پٹ ءُ پول کتگ۔ بارڈر کراسنگز آنی سر ءَ مردم آناں گیش کنگ بوھگ ءَ انت تانکہ مال ءِ چیکنگ ءُ روگ ءُ آیگ ءَ را ٹریکنگ گہتری ءَ بوت بہ کنت۔ دیوان ءَ را سرپد کنگ بوت کہ گیر کانودی پیٹرول ءِ اسمگلنگ ءَ را گر ءُ دار ءُ امبار آنی چیر دیوک آنی ھلاپ ءَ آپریشن آنی گیش کامیاتی رستگ۔
