کوئٹہ۔ 01 دسمبر (اے پی پی) ڈپٹی اسپیکر قومی اسمبلی قاسم خان سوری پارینے کہ ریل مچ آ دنیا ٹی سفر کن خاص و اڑزآن ءُ سُواری اسے کوئٹہ غان کراچی آ ہنوک آ بولان میل انا دُوارہ بحالی آن نئے بیرہ کوئٹہ ریلوائی اسٹیشن نا رونق آک ودرہ بلکن روزگار نا فراوانی اٹ الس ءِ اڑزآن سُواری اس ہم دوئی مریک ۔ ایم ایل ون ڈٹ انا سوب آن گوادر مچ آ پاکستان تون منسلک مریک۔ بوستان ژوب ریلوائی اسٹیشن نا بحالی ، اکبر بگٹی ایکسپریس و کوئٹہ غان ایلو ٹرین تا ہم زوت بناءِ کننگک۔ داہیت ءِ او چارشنبے نادے آ ریلوائی اسٹیشن اٹ بولان میل انا دُوارہ بحالی نا وخت آ اڈ ہلوک آ دود آن تران کرساپارے۔ داوخت آ پاکستان ریلوائی نا ڈی جی لینڈ حفیظ اللہ، ڈی ایس ریلوائی کوئٹہ محمد علی آفریدی و ایلوفک ہم ساڑی ئسر۔ ڈپٹی اسپیکر قاسم خان سوری پارے کہ بنجائی حکومت پاکستان ریلوائی ءِ نت تیا سلفنگ کن گام گیج کننگ ءِ و بولان میل انا بحالی ہندا چرجوئی نا اسہ کڑی اسے۔ اوپارے کہ پی ٹی آئی تینا منشور نا رداٹ اوورسیز پاکستانی تے وونٹ انا حق تننگ نا قول ءِ پورو کرینے۔ بلوچستان نا کوٹہ غا بنجائی محکمہ غاتے ٹی ورناتے روزگار نا فراوانی کن وزیراعظم عمران خان غٹ محکمہ غاتے چٹھی نوشتہ کرینے ای بطور گچین قومی اسمبلی نا باسک کوئٹہ شار و بلوچستان نا ورناتا مقدمہ تون ہر فورم آ مون تسونٹ۔ جعلی ڈومیسائل آ بلوچستان نا کوٹہ غا بھرتی تا چھان بین نا چرجوئی نا بناءِ کننگانے، ضلعی انتظامیہ کوئٹہ تون اوار صوبہ نا بھاز انگا ضلع غاتے ٹی جعلی ڈومیسائل، بلوچستان نا کوٹہ غا ملازمت کروک آ بندغ آتا ڈومیسائل آتے منسوخ کرینے۔ قاسم خان سوری پارے کہ وزیراعظم عمران خان سمارٹ لاک ڈاؤن نا تصور ءِ ترسا نیزگار آتا روزگار ءِ بند مننگ آن بچفے ہنداخاطرآن جہانی ادارہ جان جوڑی (ڈبلیو ایچ او) و ایلو ادارہ غاک کورونا دین اٹی پاکستان نا گام گیج آتا ستاءِ کرینو۔ اولیکو وار بزغرآتے کن بے سود وام تا فراوانی نا بناءِ کننگ انگ ءِ وخت اس کہ جان جوڑی کارڈ انا جاری کننگ آن نیزگار آ بندغ 10 لکھ روپئی اسکان پرائیویٹ ہسپتال آتے ٹی تینا درمان ءِ کرفنگ کیک۔ اوپارے کہ گیس انا کوڑی تیٹی کمتی بننگ آن الس ءِ گیس پریشر اٹی کمتی تون مون تروئی تمک وخت اس کہ کوئٹہ و بلوچستان نا ایلو علاقہ غاتا شاری تے یخ انا موسم اٹ گیس انا فراوانی، کم پریشر و بلنگ و ایلو ویل آتا ایسر کننگ کن بنجائی وزیر توانائی تون ہیت کرینن دُن تو داوخت آ مچ آ دنیا ٹی کبینی نا لہر ءِ ولے حکومت احساس کارڈز، یوٹیلیٹی سٹورآتیا سبسڈی و پین گام گیج کرسا الس ءِ ریلیف فراوان کننگ ءِ۔ قاسم خان سوری پارے کہ محکمہ ریلوائی بوستان آن ژوب اکان ریلوائی اسٹیشن نا بحالی کن گام گیج کننگ ءِ وخت اس کہ کوئٹہ غان ژوب اسکان سڑک ءِ دورویہ کننگ انگ ءِ ہراڑآن الس ءِ آسانی ملک و ٹریفک شکست آتے ٹی کمتی بریک۔
