راولپنڈی۔ 01 دسمبر (اے پی پی) بنجائی وزیر داخلہ شیخ رشید احمد پارینے کہ بروک آ گچین کاریک الیکٹرانک ووٹنگ مشین نا کمک اٹ مریرہ، وزیراعظم عمران خان اوورسیز پاکستانی تے وونٹ انا حق ترفے، نالائخ و نابود اپوزیشن بروک آ گچین کاری تیٹی ہم شکست آن پد دھاندلی ناغوغاکیک، تبلیغی جماعت آتےآن لائن ویزہ تننگ انگ ءِ، سعودی عرب تون بے مٹ رشتہ و چین گچین انگا سنگت ءِ، راولپنڈی ٹی 60 کالج جوڑ کرین و نیزگار آتا غٹ خلق آتے ٹی سرکاری اسکول و کالج آتے اپ گریڈ کننگ انگ ءِ، مسڑ خوانندہ مریک تو شار اٹی اسٹ اس ہم منشیات فروش یا کوزہ گیر کاٹم ہرفنگ کپک، داخیال آتا درشانی ءِ شیخ رشید احمد چارشنبے نادے آ راولپنڈی ٹی کالج نا اپ گریڈ یشن ڈٹ انا بنائی دود آن تران کرسا کرے۔ داوخت آ پارلیمانی سیکرٹری شیخ راشد شفیق، ڈائریکٹر کالجز شیر احمد ستی، کالج پرنسپل و طالب علم آتا بھلو کچ اس ساڑی ئسر۔ کالج نا طالب علم آک بنجائی وزیر ءِ بخیر کریر وپھل چٹ تسر۔ شیخ رشید احمد پارے کہ مدینہ نا ریاست نا وژن نا رداٹ بنجائی کابینہ اہم ءُ فیصلہ کرینے کہ غٹ تبلیغی جماعت آتے آن لائن ویزہ تننگک۔ اوپارے کہ وزیراعظم عمران خان ءِ دا کریڈٹ کاہک کہ اوورسیز پاکستانی تے وونٹ انا حق ترفے انتئے کہ اوورسیز پاکستانیک ہمیڑے دے و نن خواری کرسا پاکستان اٹ تینا چنا ورشتہ دار آتے پیسہ مون تننگ ءُ ہنداخاطرآن وونٹ اوفتا حق ءِ۔ اوپارے کہ اپوزیشن داسہ انت کہ مرضی ءِ تے کہ بروک آ گچین کاریک الیکٹرانک ووٹنگ مشین نا کمک اٹ مریرہ۔ شیخ رشید احمد پارے کہ پنجاب نا چِل حلقہ غاتے ٹی اوورسیز آتا وونٹ آتا فیصلہ الیکٹرانک ووٹنگ مشین نا کمک اٹ مریک و ہراتم پی ٹی آئی دا وونٹ آتے اٹ بھلو گیشتری اسے اٹ کٹک تو اپوزیشن اسہ وار ولدا دھاندلی نا غوغاکیک۔ اوپارے کہ کبینی نا ایسر اس پٹوئی ءِ انتئے کہ کبینی نا سوب آن تنخواہ دار تپہ زہمی مننگ ءِ۔ شیخ رشید احمد پارے کہ سعودی عرب تون پاکستان نا بے مٹ رشتہ ءِ ہراوام تے تننگا اوفتیا سعودی حکومت نا بھاز منت وار اُن و چین ہم ننا گچین انگا سنگت ءِ۔ شیخ رشید احمد پارے کہ تعلیمی پڑاٹ اسہ بھاز بھلو بدلی اس دا بننگ ءِ کہ مسنک مون آ پیش تمنگ ءُ و مارک پدی سلنگ ءُ۔ راولپنڈی ٹی ساڑی اخس کہ نیزگار آتا خلق آک ءُ ہموڑے مسن تا سرکاری اسکول و کالج آتے اپ گریڈ کننگک۔ ہراشار انا مسڑ خوانندہ مریک اودے دنیا نا اسہ طاقت اس ہم شکست تننگ کپک و نئے اوڑے منشیات فروش، جواری یا کوزہ گیر اس کاٹم ہرفنگ کیک۔ راولپنڈی ٹی داتم اسکان 60 کالج جوڑکرین۔ آئی ٹی یونیورسٹی آن پد مسہ یونیورسٹی پورو مریرہ۔ آبادی زیات مننگ نا سوب آن زالبول کالج آتے ٹی اِرا شفٹ اٹ تعلیم تننگک۔
