اسلام آباد۔ 10 اپریل (اے پی پی) بنجائی وزیر سائنس و ٹیکنالوجی رانا تنویر حسین پارینے کہ حکومت ملک اٹی اقتصادی شونداری کن سائنسی وٹیکنالوجی پروگرام تا جاری کننگ کن پرعزم ئِ۔ ٹیکنالوجی ادارہ غاتے سوگو جوڑ کننگ و ہندی اختراعی نظام نا کاریم نا کچ ئِ ودفسا ہی علم آمبنی معیشت نا مون آ دننگ ممکن ئِ۔ او دوشنبے نا دے داڑے نیشنل یونیورسٹی آف سائنس و ٹیکنالوجی (نسٹ ) نا کنڈآن پاکستان اٹی صنعتی شونداری کن روبوٹکس شونداری کن روبوٹکس ٹیکنالوجی نا کاریم اٹ اتنگ نا بارواٹی اسہ ورکشاپ اسے آن تران کریکہ۔ اوپارے کہ ساڑی دور اٹی روبوٹس آن زند انا بے کچ اہم بشخ آتیٹی استفادہ کننگ انگ ئِ ، ننا مسخت علم آ مبنی معیشت ئِ مون آ درسا انسانی گچینی کن پوسکن آ ٹیکنالوجی تے کاریم اٹ اتوئی ئِ۔ اوپارے کہ صنعت نا اختراع کن اکیڈیمیا آ انحصار ئِ ، گرج آ مبنی پٹ وپول و ٹیکنالوجی نا مون آ دننگ کن گام گیج بھاز اہم ئِ۔ اوپارے کہ صنعت و تعلیمی ادارہ غاتا نیام اٹ کمک تعلقدار بشخ آتیٹی پائیدار شونداری کن المی ئِ۔ داوخت آ سیکرٹری سائنس و ٹیکنالوجی فضل عباس خیال آتا درشانی ئِ کرسا پارے کہ دا ورکشاپ نا بنداوی خیال صنعت و خذمت آتا بشخ آتیٹی روبوٹس نا کاریم اٹ اتنگ نا است بڈی ئِ کننگ نا ئِ ہراڑآن یونٹ آتا پیداواری کاریم نا کچ اٹی ودکی مریک۔
