اسلام آباد۔ 10 نومبر (اے پی پی) بنجائی وزیر حوالکاری و شینکاری چوہدری فواد حسین پارینے کہ وزیراعظم عمران خان سانحہ اے پی ایس ازخود نوٹس آ سپریم کورٹ اٹ پیش مرسا عدالتی پرمان آ عمل کرے، داہموشرف ءِ ہراپی ٹی آئی نا حکومت تینا ادارہ غاتا کیک، سانحہ اے پی ایس آ مچ آ قوم انا است ڈکھیاءِ، چار ہفتہ ٹی سپریم کورٹ نا پرمان تیا پیش رفت نا بارواٹ رپورٹ جمع کرفنہ، انٹیلی جنس بے سہبی نائن الیون واقعہ ٹی ہم مس، ہفت بمبار وائٹ ہاؤس نا مون آ ہوٹل اٹ مسہ تُواسکان رہینگار ہرانا کس اسے معلوم متو، سانحہ اے پی ایس اٹی انٹیلی جنس بے سہبی آن پد پاکستان نا سیاسی سرکڑدہ نیشنل ایکشن پلان اس ٹہیفے، ملک آن دہشت گردی ءِ ماس آن چٹفنگا، نیشنل ایکشن پلان آن پد اینو ننا زند نارمل مسنے، امن مننگ اٹ پاک فوج و سیکورٹی ادارہ غاک بے پناہ قربانی تسنو۔ داخیال آتا درشانی ءِ او چارشنبے نادے آ داڑے سپریم کورٹ نا پیشن میڈیا تون گپ وتران کرسا کرے۔ داوخت آ وزیرداخلہ شیخ رشید احمد ہم ساڑی ئسک۔ چوہدری فواد حسین پارے کہ وزیراعظم عمران خان سپریم کورٹ اٹ پیش مرسا عدالتی پرمان آ عمل کرے ، وزیراعظم آئین و کانود نا حکمرانی ءِ نافذ کرسا نشان تس ہرا ننا منشور نا بشخ اسے، داہمو شرف ءِ ہراپی ٹی آئی نا حکومت تینا ادارہ غاتا کیک۔ بنجائی وزیر حوالکاری پارے کہ سانحہ اے پی ایس آ پاکستان نا ہر شاری ڈکھیاءِ، سانحہ اے پی ایس نا وخت آ مسلم لیگ (ن) برسراقتدار ئس، ، ننکن بھاز آسان ئس کہ نن اوفتے دوبہ دار گوندسا ہیت ءِ چٹفوسن، ولے نن تینا جند آن زیات پاکستان نا قومی وحدت ءِ ہرنہ۔ اوپارے کہ سانحہ اے پی ایس آملک انا غٹ سیاسی جماعت آک اختلاف آتے پدپشت تخسا یکجا مرسا نیشنل ایکشن پلان اس ٹہیفیر، دا نیشنل ایکشن پلان نا پدی مچ آ قوم سلوک ءِ۔ اونا پاننگ ئس کہ انٹیلی جنس بے سہبی نائن الیون واقعہ ٹی ہم مس، ہفت بمبار وائٹ ہاؤس نا مون آ ہوٹل اٹی مسہ تُواسکان رہینگار ہرانا کس اسے معلوم متو۔ اوپارے کہ سانحہ اے پی ایس اٹ انٹیلی جنس بے سہبی آن پد گام گیج چست کننگا اونا رداٹ پاکستان آن دہشت گردی ءِ چٹفنگا، نیشنل ایکشن پلان آن پد اینو ننا زند نارمل مسنے، ہنداخاطرآن پاک فوج و سیکورٹی ادارہ غاک بے پناہ قربانی تسنو۔ اوپارے کہ پاکستان نا سیاسی سرکڑدہ غاتے ہم کریڈٹ کاہک، پارلیمان دا باندات آ قومی سیوت اس ٹہیفے، اینو ہم نن ہندا نیشنل ایکشن پلان ءِ مون آ درسا ہِننگ اُن۔ بنجائی وزیر حوالکاری پارے کہ پاکستان تحریک انصاف نا حکومت نا مسہ سال پاکستان نا تاریخ نا پرامن انگا سال آک ءُ، نن کورونا دین انا مقابلہ ءِ کرین و زرگزرانی چیلنج آتون سرسہبی اٹ مون تسن۔ اوپارے کہ وزارت داخلہ، انٹیلی جنس ادارہ، پاک فوج و آئی ایس آئی ءِ کریڈٹ کاہک ہرافک ملک انا سیاسی سرکڑدہ غاتا دور اندیشانہ فیصلہ غاتیا جوان وڑاٹ عملدرآمد کریر۔ چوہدری فواد حسین پارے کہ داوخت آ اوغانستان اٹی ہراحالیت آک مون تروک ءُ اگہ پین ملک اسے داحالیت آتون مون تروئی تماکہ تو حالیت آک جتا مسرہ۔ اوپارے کہ سپریم کورٹ نا پرمان ءِ کہ سانحہ اے پی ایس اٹ ہرافتا اخلاقی زمواری مسکہ او فتے متعین کننگے، چارہفتہ ٹی سپریم کورٹ نا پرمان تیا پیش رفت رپورٹ سپریم کورٹ اٹ پیش کینہ۔ داٹی انتظامیہ، عدلیہ و ایلو ادارہ غاتون اوار غٹ ادارہ غاتے تینا تینا کاریم کروئی ءِ۔ یات سلے کہ سانحہ اے پی ایس اٹی چناتتون اوار 147زوال کریر، و 125 ٹھپی مسر، استاد آتا وارث آتے معاوضہ تننگا، پرنسپل ءِ ستارہ جیرت و تمغہ شماعت تننگا، معاوضہ ٹی پرخ انا بارواٹ ہائی کورٹ اٹی کیس 12 مارچ 2021 ء آ سرتننگا، اوڑآ پورو است جمی نا درشانی ءِ کننگا۔ آرمی پبلک اسکول اینڈ کالج نا واقعہ ٹی اوار دہشت گرد و ڈوہدار تا برخلاف پاک فوج انا کنڈآن فوجی عدالت اٹ مقدمہ چلیفنگا۔ دہشت گرد آتا ٹرائل نا حالیت داوڑئس، 6 دہشت گرد آتے پاہو نا سزا بنفنگا، دہشت گرد حضرت علی، عبدالسلام ، سبیل و مجیب ءِ 2 دسمبر 2015 ء آ پاہو تننگا وخت اس کہ دہشت گرد رضوان ءِ 24 مئی 2107ء آ پاہو تننگا، داکان بیدس دہشت گرد عتیق ءِ پاہو نا سزا بنفنگا ہرانا نظرثانی نا درخواست اگست 2016ء آن سپریم کورٹ اٹی ءِ۔
