اسلام آباد۔ 08 اپریل (اے پی پی) صدر مملکت ممنون حسین پارینے کہ انتہاپسندی نا گمراہ کن انداز فکر انا بیخ کنی کن دین مبین نا تعلیم آتا روشنی ٹی ورندی بیانیہ وخت انا اہم ئُ گرج اسے ہرانا تیاری کن عالم اسلام نا دانش ور اواری اٹ کاریم کیر و داچرجوئی ٹی خڑکی رابطہ غاتے استوار کیر، دہشت گردی اسہ عالم گیر ئُ فتنہ اسے ہراڑتون مون تننگ کن امنائی لائحہ عمل اس اختیار کننگ نا گرج ئِ۔ صدر مملکت ممنون حسین دا ہیت ئِ امام کعبہ شیخ صالح محمد بن طالب تون ہیت وگپ کرسا پارے ہرا ہفتہ نا دے داڑے ایوان صدر اٹی اوڑتون اوڑدہی کرے۔ داوخت آ بنجائی وزیر مذہبی امور سردار محمد یوسف ، قومی اسمبلی نا قائمہ کمیٹی نا چیئرمین حافظ عبدالکریم ، سینیٹر طلحہ محمود، سعودی سفارت کار و ایلو بڑزکو کمامدارآک ہم ساڑی ئسر۔ صدر مملکت پارے کہ دہشت گردی اسہ عالم گیر ئُ فتنہ اسے ہراڑتون مون تننگ کن امنائی لائحہ عمل اس اختیار کننگ نا گرج ئِ۔ دا چرجوئی ٹی عالم اسلام ئِ سیوت اٹ کاریم ہلسا اسیجائی کوشست کروئی مرے۔ اوپارے کہ عالم اسلام نا ورناتے پوسکن آ دور انا گرج آتیان معلومدار کننگ نا گرج ئِ ، ہنداخاطران دینی تعلیم نا نصاب اٹی بے کچ احتیاط اتون بدلی کروئی مرے، دا چرجوئی ٹی عالم اسلام نا اہل علم نا خڑکی رابطہ بھاز المی ئِ۔
