اسلام آباد۔ 08 اپریل (اے پی پی) وزیراعظم محمد نواز شریف پارینے کہ خانہ کعبہ نا سوب آن پاکستان نا الس سعودی عرب تون مذہبی و روحانی رشتہ غاتیٹی گنڈوک ئُ، اسلا م نا مابت ، امن، سگ و انسانیت نا شرف نا کلہو ئِ مچ آ دنیا اسکان سرکننگ وخت انا گرج ئِ ، مذہبی اسکالر و راہشون آتے اسلام نا برخلاف منفی پروپیگنڈا غاتا بایدے امنائی اٹ سدباب ئِ کیر۔ اوداہیت ئِ ہفتہ نا دے داڑے امام کعبہ شیخ صالح بن محمد بن طالب تون اوڑدہی ٹی ہیت وگپ کرسا پارے۔ وزیراعظم داوخت آ امام کعبہ نا پاکستان اٹی جم و جوش اٹ خیرمقدم ئِ کرے و پارے کہ خانہ کعبہ نا سوب آن پاکستان نا الس سعودی عرب تون مذہبی و روحانی رشتہ غاتیٹی گنڈوک ئُ۔ وزیراعظم پارے کہ گوکہ پاکستان و سعودی عرب جغرافیائی اعتبار اٹ اسہ ایلو آن مر واقع ئُ ولے ہڑتوم آ ملک آتا سلامی و دودوربیدہ ہی اقدار نا سوب ننا است آک ملوک ئُ ، وزیراعظم پارے کہ پاکستان و سعودی عرب اسہ ایلو نا خڑک و سوگو تعلقداری تا حامل ئُ و ہڑتوم آ ملک آتا الس اٹی اسہ ایلو کن بھاز شرف ئِ۔ وزیراعظم زور شاغا کہ اسلام نا کلہو مابت، امن، سگ، صلہ رحمی و انسانیت نا شر ف ئِ، و دا وخت انا گرج ئِ کہ دا کلہو ئِ مچ آ دنیا اسکان سرکننگے۔ وزیراعظم پارے کہ مذہبی اسکالر و راہشون آتے اسلام نا برخلاف منفی پروپیگنڈا نا امنائی اٹ بایدے سدباب ئِ کروئی مرے ۔ امام کعبہ داوخت آ پاکستان آ بننگ آ پبی بیا بخیر آ وزیراعظم نا منت واری ئِ ادا کرے۔ داوخت آ پاکستان اٹی سعودی عرب نا قائم مقام سفیر حبیب اللہ البخاری، بنجائی وزیر مذہبی امور سردار محمد یوسف و ایلو بڑزکو کمامدارآک ہم ساڑی ئسر۔
