اسلام آباد۔ 08 اپریل(اے پی پی) وزیر داخلہ چوہدری نثارعلی خان پارینے کہ مسلم لیگ ن نا حکومت ملک ئِ بدامنی و تنکی تیان کشسا شونداری نا کسر آ روان کننگ نا بنداو ئِ تخانے، تعلیم، جان جوڑی ، کنوئی ئُ صاف دیر، گچین ذرائع ہن و بر و کرپشن کون آ ویل آتا موثر تدارک کن المی ئِ انتظامی مشینری و خاص کر بلدیاتی نمائندہ غاک تینا زمواری تا احساس ئِ کیر و دا ویل آتا ایسری کن کنا کمک ئِ کیر، گچین مروک آ نمائندہ غاک لس بندغ نا واک و توار جوڑ مریر تاکہ او تینا حق اکن توار چست کننگ کیر، گچین مروک آ نمائندہ غاک السی رابطہ مہم ئِ ترند کرسا السی ویل آتا پیدواری و اوفتا ایسری ٹی تینا کڑد ئِ ادا کیر۔ اوداخیال آتا درشانی ئِ واہ کیٹ نا بلدیاتی نمائندگان، مسلم لیگ ن نا سرکڑدہ و علاقہ نا معتبر آتیان تران کرسا کرے۔ وزیر داخلہ پارے کہ پاکستان نا الس سچ و دروغ ، ثابت گامی و مفاد پرستی ، سیاست و واپار کروک آتا نیام اٹ پرخ کیر۔ سیاست ئِ بدکڑداری و کرپشن نا ذریعہ جوڑ کروک آک سیاست و جمہوریت ہڑتوم آ تے کن زہر قاتل ئُ۔ وزیر داخلہ پارے کہ گدرینگوک آ دہ سال اٹی بروک آ حکومت آک ویل آتا انبار اس ہلار، ساڑی حکومت نئے بیرہ تینا دور انا تنکی تا مقابلہ ئِ کرے بلکن گدرینگوک آ دور انا مچ مروک آ ویل آتا شت اٹی کمتی ایسور۔ دہشت گردی آن معیشت و لوڈشیڈنگ آن ہلیس بے لاگ کرپشن اسکان گدرینگوک آ دور انا حکومت آک بنداوی ویل آتا ایسری کن اسہ خشت اس ہم تخانو یا پالیسی اس جوڑ کرینو تو اودے قوم انا مون آ اتنگے۔ ٹیکسلا ، واہ و ایب و کیب اٹی جاری چندی شونداری کاریم تا ذکرئِ کرسا وزیر داخلہ پارے کہ داحلقہ نا نمائندہ مفننگ نا باوجود ہم داوخت اسکان ارب آ روپئی نا ریکارڈ شونداری پروجیکٹ اوفتا علاقہ غاتا الس تون مابت و علاقہ نا جوڑ جاڑ و شونداری کن جوزہ نا شاہدی اسے۔
