کوئٹہ۔ 08 اپریل (اے پی پی) بلوچستان اسمبلی نا دیوان اٹی پلاسٹک آن تیار گڑاتیٹی کُننگ نا گڑاتیا پابندی نا بابت قرارداد نا منظوری تننگا وخت اس کہ باسک آک نصیر آباد و جعفر آباد تون اوار صوبہ نا چندی علاقہ غاتیٹی مریس لوڈشیڈنگ نا نوٹس ہلنگ نا خواست کریر۔ دیوان ہفتہ نا دے اسپیکر راحیلہ حمید خان درانی نا کماشی ٹی مس۔ ایوان انسانی جان جوڑی نا پیش نظر و چاگڑدی آلودگی نا مون ئِ توننگ نا رداٹ پلاسٹک آن تیار گڑاتیٹی کُننگ نا گڑاتیا پابندی نا بابت قرار داد نا امنائی وڑاٹ منظوری ئِ تس ، دا قراردادئِ وزیراعلیٰ نا سلاہکار اطلاعات سردار رضا محمد بڑیچ پیش کرے۔ قرارداد اٹی خواست کننگا کہ پلاسٹک آن تیار گڑاتیٹی اوار کیمیکلز انسانی جان جوڑی کن نسخان دہ ئُ۔ جدید پٹ وپول نا رداٹ پلاسٹک آن تیار مروک گڑاتا کُننگ نا مسخت آتے کن کاریم اٹ اتنگ آن انسانی جان جوڑی آ مضر زئم تمک۔ دیوان اٹی باسک صوبائی اسمبلی سید محمد رضا، سردار رضا محمد بڑیچ و پرنس احمد علی کوئٹہ بالی پٹ اٹی سیکورٹی نا نظام غیر معیاری مننگ نا بابت قرارداد پیش کرے ولے اسپیکر وزیر داخلہ بلوچستان میر سرفراز بگٹی نا کنڈآن یخین دہانی و اے ایس ایف کمامدارآتا کنڈآن باسک اسمبلی ئِ کوئٹہ بالی پٹ نا سیکورٹی نا بابت بریفنگ نا یخین دہانی آ اودے چٹفے۔
