ہرنائی۔ 08 اپریل (اے پی پی) کمشنر سبی ڈویژن ڈاکٹر محمد سعید جمالی پارینے کہ پولیو نا چٹفنگ کن قومی پولیو مہم ئِ ہر دروشم اٹ سرسہب کننگک، ہر چنائِ پولیو آن بچفنگ نا پڑی کنفنگ کن غٹ ضلع غاتا ڈپٹی کمشنر ایس ایس پی محکمہ جان جوڑی نا آفیسر ڈبلیو ایچ اوز نا نمائندہ غاک تینا کڑد ئِ ادا کیر، قومی پولیو مہم ئِ سرسہب جوڑ کننگ کن غٹ وسیلہ غاتے کاریم اٹ اتنگے وہدف ئِ ہردروشم اٹ پورو کننگے، چناک ننا نہادی سرمایہ غاک ئُ اوفتا جان جوڑی نا رکھ ئِ ہردروشم اٹ المی جوڑ کننگے قومی پولیو مہم اٹی خذمت سرانجام تروک آ پولیو ورکرز آتا فول پروف سیکورٹی ئِ ہم المی جوڑ کننگے، داخیال آتا درشانی ئِ او سبی ٹی ڈویژنل ٹاسک فورس تدارک پولیو مہم نا چرجوئی ٹی اہم دیوان نا کماشی ئِ کرسا کرے۔ دیوان اٹی ایڈیشنل کمشنر سبی مامول حمید، ایس ایس پی سبی سردار محمد حسن موسیٰ خیل ، ڈپٹی کمشنر کوہلو آغا نبیل، ڈپٹی کمشنر زیارت خالق مندوخیل، ایس پی کوہلو میر عیسیٰ خان، ضلعی ناظم اعلیٰ سبی ڈاکٹر منظور حسین بلوچ، ڈی ایچ او کوہلو ڈاکٹر ظفر ، ڈی ایچ او زیارت ڈاکٹر ارباب ، ایس پی زیارت حنیف و ایلو آفیسر ڈبلیو ایچ اوز نا نمائندہ غاک ہم ساڑی ئسر۔
