اسلام آباد۔ 08 اپریل (اے پی پی) صدر آزاد جموں و کشمیر سردار مسعود خان تون چیئرمین واپڈ الیفٹیننٹ جنرل (ر) مزمل حسین اوڑدہی کرے ہراٹی آزاد جموں و کشمیر اٹی زیر تکمیل ہائیڈرو پاور پروجیکٹ، منگاڈیم نا واٹر یوسیج چارجز، سندھ طاس معاہدہ، بھارت نا کنڈآن دے ٹکی و دیکی دریاتیا ڈیم جوڑ کننگ و دیر ئِ توننگ، آزاد کشمیر اٹی لوڈشیڈنگ تون اوار تین پہ تینی است خواہی نا معاملہ غاتیا سرجم خیال آتا درشانی کننگا۔ ہفتہ نا دے مروک آ اوڑدہی ٹی چیئرمین واپڈا پارے کہ نیلم جہلم ہائیڈرو پاور پروجیکٹ نا اولیکو یونٹ فروری 2018 ءارٹ میکو مارچ و مسٹ میکو و چارمیکو یونٹ اپریل اٹی پیداوار نا بنائِ کیرہ۔ ڈٹ آتا ٹرانسمیشن لین 80 درسد پورو مسنے۔ ڈٹ انا اسہ ٹینل اس پورو مسنے و ارٹ میکو ہندا تُو 29 اپریل آ پورو مریک۔ صدر آزاد کشمیر ہیت وگپ اٹی پارے کہ سندھ طاس معاہدہ نا بابت قومی کہول آ سوچ بچار بایدے مرے۔ پاکستان ئِ آخبت اٹی دیر انا کاختی نا مون تروکی مریک، برسات اٹی داڑے جلاب آتیان تباہی مریک و بھلو کچ اسے ٹی دیر زیان مریک ، ہمو دیر ئِ خشک موسم آتیٹی کاریم اٹ اتنگ کن آبی کوڑی جوڑ جاڑ کننگ نا گرج ئِ ۔ اوپارے کہ بھارت سندھ طاس معاہدہ نا خلاف ورزی کننگ ئِ و دے ٹکی دریاتا رخ ئِ اسہ پلو کننگ نا دھڑکو ایتک ولے او داوڑ کننگ کپک۔ البتہ خشک موسم اٹی دیر ئِ تورسا و برسات نا وسم اٹی دیر ئِ ہلسا ویل ودی کننگ کیک۔ چیئرمین واپڈا پارے کہ بیرہ آزاد کشمیر آخا مچ آ ملک ئِ بروک آسال اسکان لوڈشیڈنگ آن نجات ملک۔ تھرمل پاور نا مسہ ڈٹ ہم ہندا سال ستمبر اسکان پورو مریرہ۔ ہرافتیان 3600 میگاواٹ بجلی ودی مریک۔ ہائیڈرو پاور آن بروک آ سال اسکان 16000 میگاواٹ بجلی نا پیداوار ممکن مننگ کیک۔ تربیلا فور جون اٹی پور و مریک۔ ہراڑآن 1410 میگاواٹ بجلی ودی مریک۔ تربیلا 5 آ ہم زوت کاریم نا بنائِ کینہ۔ گولن گول چترال و کچھی کینال ڈٹ آ ہم کاریم ترندی اٹ برجائِ۔ دیامیر بھاشا ، داسو، بھونجی و ایلو ڈٹ آتے کن ڈغار دوئی کننگانے۔ پی سی ون تیار ئِ اوڑآ زوت کاریم نا بنائِ کننگک۔
