اسلام آباد۔ 07 اپریل (اے پی پی) بنجائی وزیر ڈٹ بندی و شونداری اصلاحات احسن اقبال پارینے کہ سی پیک ترندی اٹ حقیقت اٹ بدل مننگ ئِ، سی پیک نا برخلاف ہچ ئُ چمب اس سرسہب مفک، پاکستانی قوم سی پیک نا رکھ اکن مخ ئِ تفینو۔ داخیال آتا درشانی ئِ او جمعہ نا دے گوادر چیمبر آف کامرس نا سیمینار آن تران کرسا کرے۔ اوپارے کہ سی پیک نامزل پاکستان اٹی صنعتی انقلاب اس ودی کننگ نا ئِ، توانائی ، انفراسٹرکچر ، بندرگاہ نا ڈٹ آک پاکستان اٹی صنعتی انقلاب نا بنداو اس تخرہ۔ اوپارے کہ چین آن 85 ملین روزگار کم پیداواری لاگت نا ملک آتے منتقل مریک۔ سی پیک نا کمک اٹ نن دانا بھلو بشخ اس دوئی کننگ کینہ، گوادر ئِ جدید ترین پورٹ سٹی اس جوڑ کننگ کن ماسٹر پلان آ کاریم نا بناءمسنے۔ اوپارے کہ گوادر اٹی پوسکن آ بالی پٹ انا جوڑ جاڑ سال رواں اٹی بناءکیک۔ گوادر آن کوئٹہ و گوادر آن رتو ڈیرو شاہراہ تا پوروی بلوچستان ئِ شونداری تون گنڈنگ اٹی کلیدی کڑد ادا کننگ ئِ۔ احسن اقبال پارے کہ سی پیک آ غٹ صوبائی حکومت آک بنجائی حکومت تون اواری اٹ کاریم کننگ ئُ، گوادر یونیورسٹی کیمپس نا بنائِ کننگانے، سی پیک پاکستانی بزنس کن تاریخی وارخواہی اس ایسونے، نجی بشخ انا فرض ئِ کہ سی پیک آن فائدہ ہرفنگ نا پبی تیار ی ئِ کے۔ اوپارے کہ صنعتی زون تیٹی پاکستانی تے روزگار ملک، مسہ سال آتیٹی سی پیک معاہدہ ئِ کاغد آن ارب آ ڈالر نا زرکاری ٹی شاغنگ چنکو سرسہبی اس اف۔ سی پیک نا دشمنک پاکستان نا دشمنئُ ۔ پاکستان ڈیہہ ٹی واپار و صنعت اس جوڑ مرسا مون آ بریک ۔ اوپارے کہ سی پیک 50 ارب ڈالر آن دنیا ٹی علاقائی کمکاری نا غٹ آن بھلا ڈٹ جوڑ مرسا مون آ بسنے ، سی پیک ڈیہہ ٹی امن، شونہالی و شونداری نا پیش خیمہ اسے۔
