اسلام آباد۔ 07 اپریل (اے پی پی) گدرینگوک آ مسہ سال اٹی اسکول آ ہنپروک آ چناتا کچ اٹی 26درسد کمتی مس و پرائمری اسکول آتیٹی چناتا درج آتیٹی 17 درسد ودکی مس، داڑآن کاریم کننگ نا سمت تو مقرر مسنے ولے مزل اسکان سرمننگ کن مریس ئُ کسر اس ساڑی ئِ، تعلیم اسکان رسینگ، استاد آتا بھرتی و اسکول آتیٹی آسراتی تا دستیابی حکومت نا اولیت آتیٹی اوار ئِ۔ داخیال آتا درشانی ئِ وزیر مملکت بنجائی تعلیم و پیشہ ورانہ تربیت انجینئر بلیغ الرحمان وسیلہ تعلیم آ بی آئی ایس پی نا کنڈآن اسہ صلابتی دیوان اسے ٹی کرے۔ ہراڑے وسیلہ تعلیم نا رداٹ اسکول آتیٹی اندراج چناتا حاضری نا مانیٹرنگ کن ڈیش بورڈ پیش کننگا۔ وزیر مملکت و چیئرپرسن بی آئی ایس پی ، ایم این اے ماروی میمن ، سیکرٹری بی آئی ایس پی یاسمین مسعود، بی آئی ایس پی کارندہ، جہانی بینک ، ڈی ایف آئی ڈی، الف عالیان، امریکن ریفیوجی کمیٹی و ادارہ تعلیم و آگاہی نا نمائندہ غاک دیوان اٹی شرکت کریر۔ وزیر تعلیم اسکول آتیٹی چناتا حاضری نا چاروکی کن وسیلہ تعلیم ڈیش بورڈ نا ستائِ کرے و دا بشخ اٹی ٹیکنالوجی نا کڑد تعلیم کن گیم چینجر اس جوڑ مریک۔ بی آئی ایس پی نا وسیلہ تعلیم پروگرام تعلیم نا مون آ دننگ کن مثالی ئِ و داپروگرام ئِ ودفنگ نا گرج ئِ تانکہ دانا فائدہ غاتیٹی ودکی مرے ۔ داوخت آ ہیت وگپ کرسا وزیر مملکت و چیئر پرسن بی آئی ایس پی ماروی میمن پارے کہ بی آئی ایس پی ٹیکنالوجی آ مبنی ٹیبلٹس نا ذریعہ چناتا اسکول آتیٹی حاضری نا مانیٹرنگ آن جہانی کہول آ گچین وڑوڈول ئِ روشناس کرفینے۔
