اسلام آباد۔ 07 اپریل (اے پی پی) پاکستان اٹی تعینات امریکی سفیر ڈیوڈ ہیل پارینے کہ اختراع (انوویشن) پاکستانی اقتصادی شونداری نا بنداو ئِ ، ہڑتوم آ ملک آک پاکستان نا اقتصادی شونداری نا بنداوی مسخت نا دوئی کن اواری اٹ کاریم کننگ ئُ۔ داہیت ئِ او جمعہ نا دے داڑے اِرا دے ئی ”لیڈرزان اسلام آباد بزنس سمٹ“ نا بنائی سیشن آن تران کرسا پارے۔ بزنس سمنٹ نا بست و بند ئِ نٹ شیل فورم وزارت ڈٹ بندی و شونداری نا اواری اٹ کرینے۔ امریکی سفیر پارے کہ پاکستان و امریکہ اواری اٹ اقتصادی شونداری نا رفتار ئِ ترند کننگ، ہڑتوم آ کنڈآتا واپار ئِ ودفنگ، زرکاری کن چاگڑد نا گچینی، حق ملکیت دانش نا رکھ و انٹرپرینیور شپ ئِ مون آ دننگ کن کاریم کننگ ئُ۔ ڈیوڈ ہیل پاک امریکہ اقتصادی تعلقداری تیٹی پیش رفت نا بابت پارے کہ امریکی کمپنی تا پاکستان اٹی ساڑی گری ٹی ودکی مننگ ئِ۔ ننا مینو فیکچر رز و انفراسٹرکچر کمپنی تیان ہلسا سمال و میڈیم سروس کمپنی و امریکی پرائیویٹ سیکٹر کن پاکستان اسہ پرکشش ئُ مارکیٹ اس جوڑ مرسا کننگ ئِ۔ اوپارے کہ امریکہ نا پاکستان تون رشتہ الس نا نیام اٹ رابطہ غاتیا استوار ئِ۔ دا رشتہ بزنس ، واپارو ایکسچینج پروگرام تون اوار بنداو تیا استوار ئِ۔ بزنس سمٹ اٹی پاکستان، چین ، بحرین ، کینیڈا، قطر، یواے ای و امریکہ آن 600 آن زیات ڈل شرکت کننگ ئُ۔
