راولپنڈی۔ 07 اپریل (اے پی پی) بنجائی وزیر داخلہ چوہدری نثارعلی خان پارینے کہ تنقید کننگ آسان ئِ ، حکومت کننگ آسان اف بلکن مشکل ئُ عمل اسے ہراوخت آ مسلم لیگ ن نا حکومت برسراقتدار بسوسس تو ویل آتا انبار مون تروک ئس ولے مسلم لیگ ن نا حکومت ملک ئِ ویل آتا دا پلویڑ آن کشا، گدرینگوک آ دور حکومت اٹی ہردے دہشت گردی نا واقعہ غاک مسرہ ولے ساڑی حکومت دہشت گردی نا چٹفنگ کن ٹھوس گام گیج کرے ہرافتا مثبت نتیجہ ہم مون آ بس ۔ داخیال آتا درشانی ئِ بنجائی وزیر داخلہ چوہدری نثارعلی خان تدوک آ دے راولپنڈی نا یوسی ڈھوک منشی ٹی چکلالہ ویلفیئر سٹی پروجیکٹ نا بنداو نا دود آن تران کرسا کرے۔ اوپارے کہ تنقید کننگ آسان ئِ ہراکہ منہ بندغ کننگ ئُ ولے نن وونٹ انا حق ئِ ادا کرینن و السی ویل آتا ایسری آ چکار تخسا وطن عزیز نا شونداری نا عمل ئِ مون آ درینن۔ اوپارے کہ ویل آک اسہ نن اٹی چٹپسہ داڑکن پدریسہ خواری و جہد کروئی تمک۔ اوپارے کہ پاکستان اٹی حکومت کننگ آسان اف بھاز انگا ویل آک مون تروکئُ ، گدرینگوک آ دور حکومت اٹی ہردے اسہ کرپشن سکینڈل اس مون آ بسکہ ، دہشت گردی نا واقعہ غاک رونما مسرہ۔ چوہدری نثارعلی خان پارے کہ مخالف آتا تنقید نا باوجود ننے مون آ ہنوئی ئِ و پاکستان ئِ شونداری تروئی ئِ ، ملک انا الس مسلم لیگ ن تون ئِ، الس حق و حلال نا بیرک ئِ ہلسا نن تون تفے۔ اوپارے کہ ای تینا ہڑتوم آ حلقہ گچین کاری این اے 52و این اے 53اٹی بے پرخ شونداری کاریم کرفیٹ و جم وڑاٹ ہڑتوم آ حلقہ غاتیٹی 15، 15ارب روپئی نا شونداری اسکیم جاری کریٹ۔ اوپارے کہ چکلالہ ویلفیئر سٹی ٹی پارک، ہسپتال و مسیت نا جوڑ جاڑ تون اوار 200 کٹ آتیا تالان ہسپتال نا قیام عمل اٹی اتنگک و دا پروجیکٹ ئِ اسہ سال اسے ٹی پورو کننگک وخت اس کہ جنازہ گاہ چناتے کن گوازی نا پٹ، علاقہ نا زالبول کن پارک و فوڈ کورٹ ہم جوڑ کننگک۔ چکلالہ ویلفیئر سٹی ڈٹ انا بنداو نا دود انا وخت آ صوبائی پارلیمانی سیکرٹری چوہدری سرفراز افضل، شیخ محمد اسلم، چیئرمین دوست محمد، دادخان ، صغیر اعوان، ندیم اقبال ، کونسلر و علاقہ نا معزز آتا بھلو کچ اس ساڑی ئسر۔
