پاکستان دنیا ٹی امن کن صف اول نا ملک انا وڑاٹ کڑد ادا کننگ ئِ
اسلام آباد۔ 07 اپریل (اے پی پی) قومی سلامتی نا سلاہکار ناصر خان جنجوعہ پارینے کہ پاکستان دنیا ٹی امن کن صف اول نا ملک انا وڑاٹ کڑد ادا کننگ ئِ، پاکستان گدرینگوک آ چار عشرہ غان قربانی تننگ ئِ۔ پاک اوغان سیم بے کچ پیچیدہ ئِ۔ اوغانستان سیم آ بائیو میٹرک نظام ئِ بھس کرینے، پاکستان اٹی شدت پسندی اوغان جنگ انا سوب آن بناءکرے۔ پاکستان و اوغانستان نا سیم آ 108 روٹ ئُ ہراکان خلقت نا ہن و بر مریک ، راحیل شریف اسلامی فوجی سیوت نا چار ج ئِ سنبھالک تو ایرانی گڑتی تے مر کننگک۔ داخیال آتا درشانی ئِ او لیڈرزان اسلام آباد بزنس سمٹ آن تران کرسا کرے۔ اوپارے کہ نن بایدے دنیا ئِ پہہ مرین کہ پاکستان اسہ زیبائُ ملک اسے و دانا خلقت باصلاحیت ئُ۔ پاکستان نا جغرافیہ بھاز اہمیت تخک، سی پیک نا سوب آن اونا اہمیت اٹی پین ودکی مسنے اوپارے کہ بلوچستان اٹی واپاری و معاشی سرجزآتیٹی ودکی کن گچین وڑاٹ کاریم کننگ انگ ئِ تانکہ ہموڑے شاری تے قومی دنگ اٹی اتنگ مرے۔ اوپارے کہ ننے دنیا نا مون آ پاکستان نا مثبت تشخص ئِ تالان کروئی ئِ ، پاکستان اٹی شدت پسندی اوغان وار انا سوب آن بناءکرے۔ دنیا ٹی امریکہ اسٹ انگا سپر پاور ملک ئِ ہرا پاکستان نا قربانی تا سوب آن ئِ۔ اگہ پاکستان طالبان آتون ئِ تو پاکستانی طالبانک ننا برخلاف انت اکن جنگ کننگ ئُ۔ گڈ اٹی صحافی تتون ہیت وگپ کرسا ناصر خان جنجوعہ پارے کہ ہراتم راحیل شریف اسلامی فوجی سیوت نا چارج ئِ سنبھالک تو ایرانی گڑتی تے مر کننگک ۔ اوپارے کہ پاکستان و اونا الس ایران تون بھاز مابت و پیار کیرہ و جنرل راحیل شریف دُن ئُ ہچ ئُ گام اس ہرفپک ہراایران نا مفاد نا برخلاف مرے۔ سلاہکار قومی سلامتی پارے کہ جنرل راحیل شریف نا پنداری ئِ فرقہ واریت تون بایدے گنڈنگپ۔ اسہ سوج اسے نا ورندی ٹی اوپارے کہ پاکستان بھارت ئِ ہم چین پاکستان اقتصادی راہداری ٹی اوار مننگ نا پیش کش کرینے۔ داوخت آ تران کرسا سینیٹر مشاہد حسین سید پارے کہ سی پیک نا سوب رابطہ غاتا ودنگ آن گریٹ ساﺅتھ ایشیا جوڑ مننگ ئِ ، گریٹ ساﺅتھ ایشیا ٹی چین، ایران و دے ٹکی نیامی ہم اوار ئِ۔ سی پیک بیرہ رو ڈ اسے نا جوڑ جاڑ اف بلکن تعلیم ، توانائی و گوادر پورٹ تون اوار چندی بشخ آتیٹی کمک و زرکاری نا بھلو وارخواہی اس ہم پیش کیک۔ اوپارے کہ اوغانستان تون ننا مریس انگا سیم ئِ۔ بلوچستان و خیبر پختونخوا آن سد آ کسرتیان اوغانستان آن پاکستان آ بننگ مریک۔ بزنس سمٹ نا ارٹ میکو دے چندی بشخ آتا واپاری و کاروباری چاہندار و ملک انااہم شخصیت آک ہم تران کریر۔ دود اٹی پنی کمپنی تا چیف ایگزیکٹو ز، افسر،شعبہ واپار نا چاہندار، چندی ملک آتا نمائندہ غاک ہم بشخ ہلکر۔ چاہندار آک پاکستان اسٹاک مارکیٹ اٹی گچینی ئِ ملکی معیشت کن مثبت گوندار و پاریر کہ ملک اٹی توانائی و امن و ایمنی نا حالیت آتیٹی پدریسہ گچینی بننگ ئِ ہراڑآن کاروباری سرجزآتیٹی ہم نمان ودکی مریک۔
