اسلام آباد۔ 08 اکتوبر (اے پی پی) پبلک اکاؤنٹس کمیٹی نا دیوان جمعہ نادے آ پارلیمنٹ ہاؤس اٹی پی اے سی نا چیئرمین رانا تنویر حسین نا کماشی ٹی مس۔ دیوان اٹی کمیٹی نا باسک مشاہد حسین سید، شیخ روحیل، ابراہیم خان، اقبال محمد علی خان، خواجہ شیراز محمود، خواجہ آصف اصغر تون اوار تعلقدار سرکاری ادارہ غاتاآفیسر آک ساڑی ئسر۔ دیوان اٹی وزارت خارجہ نا2018-19و 2019-20نا آڈٹ اعتراض آتا جاچ ءِ ہلنگا۔ رانا تنویر حسین پی اے سی ءِ پارے کہ 2020-21نا رپورٹ ایوان اٹ پیش مسنے ہرادے پی اے سی ٹیک اپ کرینے۔ سیکرٹری خارجہ پارے کہ نن مالیاتی نظم ونسق انا بھاز خیال ءِ تخنہ۔ گڑاس وخت چندی وڑنا پیشن نا ملک مشن تیٹی خاص حالیت آتا سوب آن مشکل آتون مون تروئی تمک۔ رانا تنویر حسین پارے کہ ملک انا اسہ اسہ پیسہ قوم انا مقدس امانت مریک داہیت انا ہم غٹ خیال ءِ تخر۔ وڑوڈول و ضابطہ غاتے گچین کننگ کن پبلک سرونٹس بایدے مون آ کائے، پی اے سی ہرممکن حداسکان سپورٹ و راہشونی کیک۔ قاعدہ خریداری تا بابت اسہ آڈٹ اعتراض آ پی اے سی ءِ اسپیشل سیکرٹری وزارت خارجہ ورندی ترساپارے کہ ننا وزارت نا آڈٹ اعتراض آتے ٹی اسہ جاگہ اس ہم مالی کرپشن نا عنصر اوار اف۔ آڈٹ بیرہ وڑوڈول آ اختلاف کرینے۔ ننا بیوسی ءِ کہ پیشن نا ملک سفارت خانہ غاتے ٹی چھان بین آن بیدس کس اسے رسینگ تفسہ۔ سفارت خانہ غاتا سفائی نا ٹھیکہ ءِ ہم سوچ سمجھ اٹ تروئی تمک تانکہ دشمن اس فائدہ ہرفنگ کپ۔ آڈٹ کمامدارآک پاریر کہ سیکرٹری خارجہ ڈی اے سی ٹی تینٹ پارینے کہ 1698ملین نا برخلاف قاعدہ خریداری نا باندات نا جاست وپاست ءِ کرفنگے۔ پی اے سی وزارت خارجہ ءِ پارت کرے کہ اسہ تُواٹی داباندات نا جاست وپاست ءِ کرسا پی اے سی ءِ رپورٹ پیش کننگے۔
