اسلام آباد۔ 06اپریل (اے پی پی) پاکستان غٹ ملک خاص کر ہمسایہ ملک آتون پرامن تعلقداری نا عزم انا اعادہ ئِ کرسا پارینے کہ بھارت نا جنگی عزم ڈیہہ نا سلامتی کن خلیس اسے، پاکستان ہمیشہ کشمیر آ ثالثی نا خیرمقدمئِ کرینے، پاکستان سیم پار دہشت گردی نا توننگ کن تینا کنڈآ باڑاس خلنگ ئِ۔ اوغانستان اٹی امن و پراکس جنگ انا چٹفنگ اٹی اہم کڑد ادا کننگ ئِ، کشمیر نا تنازعہ ڈیہہ نا شونداری ٹی بنداوی اڑاند ئِ ، جہانی برادری بھارت اٹی مسلمان آتون ایلو مذہبی اقلیت آتیا مروک آ بیدادی نا نوٹسئِ ہلے۔ داخیال آتا درشانی ئِ دفترخارجہ نا ترجمان محمد نفیس ذکریا پنچ شنبے نا دے ہفتہ وار پریس بریفنگ اٹی صحافی تا جتا سوج آتا ورندی ئِ ترسا کرے۔ ترجمان اسہ سوج اسے نا ورندی ئِ ترسا پارے کہ پاکستان ہمیشہ ایٹمی سلہہ غاتا کاریم اٹ اتنگ اٹی پہل کپننگ نا ہیت ئِ کرینے۔ پاکستان نا تجویز کروک سٹریٹجک ریسٹرین رجیم ایٹمی تصادم آن بچنگ نا گچین حکمت عملی اسے۔ کشمیر آ ثالثی نا بابت سوج انا ورندی ٹی ترجمان پارے کہ پاکستان کشمیر آ ثالثی نا امریکی و ایرانی پیش کش نا خیرمقدم ئِ کیک۔ اقوام متحدہ نا مسکوہی و ساڑی سیکرٹری جنرل آک ہم ثالثی نا پیش کش کریسر ولے بھارت ہروارآنبار منفی ردعمل نا درشانی ئِ کرینے۔ ترجمان اسہ سوج اسے نا ورندی ئِ ترسا پارے کہ اوغانستان اٹی ساڑی پاکستانی تے ویزہ غاتا دوئی ٹی مشکل آتیان آگاہ ئِ و دا چرجوئی ٹی نن اوغان کمامدارآتون رابطہ ٹی اُن۔
