چین انا شار باﺅ ٹی میڈیا لیڈرز راﺅنڈ ٹیبل کانفرنس انا اڈتننگ، چین نا ون بیلٹ ون روٹ ڈٹ انا اہمیت ئِ تالان کننگ کن اڈتروک ایشیامیڈیا کمکاری کونسل اٹی ”اے پی پی“ ئِ نمائندگی دوئی مریک
بیجنگ۔ 06اپریل (اے پی پی) چین نا شار باﺅٹی میڈیا لیڈرز راﺅنڈ ٹیبل کانفرنس اس اڈتننگا۔ ایشیائی ملک آتا میڈیا نا بابت چندی بشخ آتیٹی کمکاری ئِ مون آ دننگ و ڈیہہ نا الس نا اسیجائی شرحالی و شونداری کن السی جمہوریہ چین نا ون بیلٹ ون روٹ انا عظیم ڈٹ انا اہمیت ئِ تالان کننگ کن اڈتروک آ ایشیامیڈیا کمکاری کونسل اٹی ایسوسی ایٹڈ پریس آف پاکستان (اے پی پی) ئِ ہم نمائندگی دوئی مریک۔ دا ہیت انا فیصلہ میڈیا لیڈرز راﺅنڈٹیبل کانفرنس اٹی کننگا۔ کانفرنس نا بست و بند ئِ باﺅفورم ایشیانا رداٹ چائنا پبلک ڈپلومیسی ایسوسی ایشن و چائنا ریڈیو انٹرنیشنل کریسس۔ داٹی پاکستان، چین ، روس، جاپان، انڈونیشیا ، تھائی لینڈ ، کمبوڈیا، منگولیا ، کوریا، نیپال ، برازیل و ترکی نا خبر رساں ادارہ غاتا سروک و بڑزکو کمامدارآک بشخ ہلکر۔ کانفرنس اٹی ایسوسی ایٹڈ پریس آف پاکستان نا نمائندگی ئِ منیجنگ ڈائریکٹر مسعود ملک کرے۔ اوپارے کہ داکانفرنس اٹی کونسل نا دائرہ کار، آپریشنل ماڈل، مالیاتی وسیلہ، کسبی اولیت، جدید ٹیکنالوجی نا کاریم اٹ اتنگ و ایلو معاملہ غاتا بارواٹی خیال آتا درشانی کننگا۔ ایشیائی میڈیا نا شونداری کن دا پوسکن آ پلیٹ فارم نا سرسہبی و اثرورسوخ ئِ المی جوڑ کننگ کن چندی باسک ملک آتا نیام اٹ کسبی معلومداری نا تبادلہ، ڈیٹابیس نا اڈتننگ، آن لائن رابطہ گروپ نا جوڑ کننگ، ملٹی میڈیا و ایلو میڈیا فارمیٹ آ تالان ٹرانسمیشن سسٹم نا اڈتننگ و دودوربیدہ ہی تبادلہ غاتا سفارشات مرتب کننگا۔ کانفرنس اٹی ادارہ جاتی رکنیت سازی آن بیدس انفرادی شمولیت نا سلاہ غا ہم امنا کننگا۔ دابابت باﺅفورم ایشیا نا رداٹ ایشیائی میڈیا کمکاری کونسل نا اڈتننگ خوش آئند گام اسے و داپلیٹ فارم ئِ کسبی و مالیاتی ، انتظامی وسیلہ غاتا بابت موثر ترین جوڑ کننگ نا سخت گرج ئِ۔ اوداکونسل نا بنجائی دفتر چین و علاقائی دفتر غٹ باسک ملک آتیٹی اڈ تننگ نا سلاہ پیش کرے۔ دارداٹ او ایسوسی ایٹڈ پریس آف پاکستان نا کنڈآن تنظیم نا پاکستان دفتر نا اڈتننگ کن پبی کمکاری نا یخین دہانی ہم کرفے۔ اوکونسل نا فعالیت ئِ المی جوڑ کننگ کن اونا رکنیت اٹی ادارہ غاتون میڈیا تون وابستہ نمان بندغ آتے ہم اوار کننگ نا سلاہ پیش کرے۔
