اسلام آباد۔ 06اپریل (اے پی پی) بنجائی وزیر خزانہ سینیٹر اسحاق ڈار تون جرمنی نا بنجائی وزیر اقتصادی کمکاری و شونداری ڈاکٹر گیرڈملر اوڑدہی کرے ہراٹی ہڑتوم آ ملک آتا نیام اٹ شونداری کمکاری تون اوار تین پہ تینی است خواہی نا چندی معاملہ غاتیا خیال آتا درشانی کننگا۔ وزیر خزانہ سینیٹر اسحاق ڈار جرمنی نا حکومت نا کنڈآن پاکستان اٹی چندی شونداری ڈٹ خاص کر پاکستان مائیکرو فنانس انویسٹمنٹ کمپنی ٹی جرمن شونداری بینک انا ایف ڈبلیو نا کمک نا ستائِ کرے۔ اوپارے کہ پاکستان مائیکرو اکنامک سوگوی نا دوئی آن پد بلند، سوگو و جم اٹنگا نمو نا دوئی آ چکار تخانے۔ اوپاکستان اٹی مالیاتی و ڈیجیٹل اوار مننگ نا مون آ دننگ نا بابت گام گیج آتے ہم تالان کرے و جرمن کمپنی تے سلہ تس کہ او پاکستان نا آزادانہ زرکاری پالیسی و خصوصی اقتصادی زون تیان فائدہ ہرفسا چندی بشخ خاص کر آٹو موٹیو و سولر پی وی ٹی زرکاری کیر۔ داوخت آ جرمن وزیر گدرینگوک آ مسہ نیم سال اٹی پاکستان نا اقتصادی سرسہبی تا اعتراف ئِ کرسا دہشت گردی و انتہاپسندی کون آ چیلنج آتون مون تننگ و جہانی امن کن اونا کوشست آتا ستائِ کرے۔ اوپارے کہ جرمنی پاکستان اٹی اقتصادی و شونداری پروگرام برجاتخک وخت اس کہ شونداری ڈٹ و کشت وکشار نا بشخ اٹی تکنیکی و پٹ وپولی کمکاری فراوان کننگ کن ہم تیار ئِ۔ اوپاکستان کن زرکاری و واپار ئِ مون آ دننگ نا چرجوئی ٹی وزیر خزانہ اسحاق ڈار ئِ جرمنی نا دورہ نا سلہ ہم تس۔ داوخت آپاکستان و جرمنی نا نیام اٹ شونداری کمکاری ئِ پین سوگو جوڑ کننگ کن اظہار آمادگی نا مشترکہ اعلامیہ غا دستخط کننگا۔ اعلامیہ ٹی مسہ بشخ بشمول گورننس ، توانائی و سوگو اقتصادی شونداری ئِ اولیتی حیثیت ترسا گونداکہ 2017-18ءٹی ہڑتوم آ کنڈآتا شونداری کمکاری نا کچ 109 ملین یورواسکان سرمننگ کیک۔
