اسلام آباد۔ 06اپریل (اے پی پی) صدر مملکت ممنون حسین پارینے کہ پاکستانی سفارتکار اقتصادی سفارتکاری آ چکارتخر تانکہ عالمگیریت نا بھرم آتیان فائدہ ہرفنگ مرے و جہانی برادری تون پاکستان نا واپاری و معاشی کمکاری ٹی ودکی مننگ کے۔ اوداہیت ئِ ملک انا اولیکو خاتون سیکرٹری خارجہ تہمینہ جنجوعہ تون ہیت وگپ کرسا پارے ہرا پنچ شنبے نا دے ایوان صدر اٹی اوڑتون اوڑدہی کرے۔ صدر مملکت تہمینہ جنجوعہ ئِ اونا پوسکن آ زمواری تیا مبارکبادی ترسا اومیت ظاہر کرے کہ او تینا گچین لائخی تتون جہانی کہول آ پاکستان نا مفاد آتا رکھ ئِ کیک۔ اوپارے کہ پاکستان نا خارجہ پالیسی نا بنداوی مسخت جہانی کمک نا کمک اٹ امن و سوگوی ئِ مون آ دننگ ئِ۔ صدر مملکت پارے کہ جہانی برادری آ پاکستان متحرک، شونداری پسندو معتدل جمہوری اسلامی پاکستان نا تصور ئِ مون آ دننگ نا گرج ئِ۔ اوپارت کرے کہ سفارتکار کشمیر نا ویل و کشمیری الس آ بھارتی بیدادی آن دنیا ئِ گچین وڑاٹ معلومدار کرسا جہانی برادری ئِ پائے کہ بھارت نا کنڈآن ہراوڑ کشمیری تا بنداوی انسانی حق ئِ پامال کننگ انگ ئِ۔ اوسیکرٹری خارجہ ئِپارت کرے کہ او درملکی سفارت کار و ڈل آتے دہشت گردی نا برخلاف کارروائی تا چرجوئی ٹی پاکستانی الس و سیکورٹی فورس آتا قربانی تیان معلومدار کے۔ اوپارے کہ سمندر پار پاکستانی تے ہروڑآسراتی تننگ کن ہم گام گیج کے۔
