اسلام آباد۔ 06 اپریل (اے پی پی) وزیراعظم محمد نواز شریف پارینے کہ پاک چین اقتصادی راہداری علاقائی واپار نا مون آ دننگ و ڈیہہ نا الس ئِ ااسہ ایلو نا خڑک اتنگ کن شاندار ئُ ڈٹ اسے، چینی صدر نا سلہ غا ”بیلٹ اینڈ روڈ فورم “ اٹی شرکت کن بروک آ تُو چین نا منتظر مرے۔ اوداہیت ئِ چین نا السی سیاسی صلابتی کانفرنس (سی پی پی سی سی) نا قومی کمیٹی نا چیئرمین یوزینگ شینگ تون ہیت وگپ کرسا پارے ہرابڑزکو کہول نا ڈل اتون اوار اوڑتون پنچ شنبے نا دے داڑے وزیراعظم ہاﺅس اٹی اوڑدہی کرے۔ وزیراعظم کمیٹی نا چیئرمین و ڈل انا باسک آتا جم وجوش اٹ خیرمقدم ئِ کرسا پارے کہ دا دورہ پاکستان و چین نا پارلیمان آتا نیام اٹ ادارہ جاتی رابطہ غاتے استوار کیک۔ اوپارے کہ ہڑتوم آ پارلیمان آتا نیام اٹ خڑکی کمکاری آن پاک چین پرجوش و دوستانہ تعلقداری تے پین سوگو رسینگک۔ وزیراعظم نواز شریف پارے کہ ہڑتوم آ ملک آتا نیام اٹ تعلقداری 2015ءٹی چینی صدر شی جن پنگ نا دورہ پاکستان اٹی سدابہار کمکاری آ مبنی تذویراتی شریداری نا بڑزتر کہول آ رسینگانے۔ وزیراعظم دہشت گردی نا برخلاف جنگ اٹی پاکستان نا سفارتی مخ تفی و کمکاری آ چین نا ستائِ کرے۔ وزیراعظم پارے کہ او چینی صدر نا سلہ غا”بیلٹ اینڈ روڈ فورم“ اٹی شرکت کن مئی 2017 ءٹی چین نا دورہ نا چاری ئِ۔ اوپارے کہ دا فورم نئے بیرہ پاکستان و چین نا نیام اٹ بلکن گیشتر دنیا تون تین پہ تینی رابطہ، بنداوی ڈھانچہ ، واپار، مالیات، السی کہول آ تبادلہ، دانشور آتا کمکاری نا اہم بشخ آتیٹی شاندار خیال آتا درشانی نا موقع فراوان کیک۔ نواز شریف داہیت آ زور شاغا کہ پاک چین اقتصادی راہداری و اوڑتون تعلقدار ڈٹ جات ہڑتوم آ ملک آتا الس آ مرکوز سوچ و علاقائی رابطہ غاتے کن اوفتا عزم انا نشانی ئِ۔ اوپارے کہ دا ڈٹ علاقائی واپار و کاروبار نا مون آ دننگ تون اوار اوار ڈیہہ نا الس ئِ اسہ ایلو نا خڑک اتنگ نا بے حد لائخی تخک۔ ننا ڈیہہ نا کروڑ آ الس دا ڈٹ انا بھرم آتیان فائدہ ہرفرہ۔ یوزینگ شینگ جم و جوش اٹ خیرمقدم آ وزیراعظم نا منت واری ئِ ادا کرسا پارے کہ پاکستان و چین نا نیام اٹ پارلیمانی تبادلہ غاتیان ہڑتوم آ ملک آتا نیام اٹ برادرانہ تعلقداریک پین سوگو مریرہ۔ چینی ڈل اٹی وائس چیئرمین سی پی پی سی سی قومی کمیٹی لین وین ژی، وائس چیئرمین و سیکرٹری جنرل سی پی پی سی قومی کمیٹی ژانگ چینگ لی، قائمہ کمیٹی نا باسک و چیئرمین کمیٹی تجاویز سنگان، باسک قائمہ کمیٹی و چیئرمین لرننگ اینڈ کلچر و تاریخی حساب وکتاب کمیٹی وانگ تائی ہوا، پاکستان اٹی چین نا سفیر سن وائی دونگ و خارجہ امور نا وزارت نا نائب وزیر لیوزین من اوار ئسر۔ چیئرمین سینیٹ میاں رضاربانی ، سینیٹ اٹی قائد ایوان راجہ ظفرالحق، وزیراعظم نا سلاہکار خارجہ امور سرتاج عزیز، سینیٹر سلیم ایچ مانڈوی والا، وزیراعظم نا سیکرٹری فواد حسن فواد و ایلو سینئر کمامدارآک ہم اوڑدہی ٹی ساڑی ئسر۔
