اسلام آباد۔ 06 اپریل (اے پی پی) وزیر مملکت اطلاعات، نشریات و قومی میرات مریم اورنگزیب پارینے کہ صحافت و سیاست اسہ ایلو کن لازم و ملزوم ئُ، حکومت صحافی تا شرحالی، اوفتا رکھ و اوفتے سازگار چارگڑد نا فراوانی کن تینا کڑد ئِ پین زیات گچین وڑاٹ ادا کیک، وزیراعظم نا سروکی ٹی حکومت صحافی تا رکھ و اوفتا شرحالی کن جرنلسٹس ویلفیئر و پروٹیکشن نا کانود اس وضع کننگ ئِ۔ داخیال آتا درشانی ئِ او پنچ شنبے نا دے یوم شہدائے صحافت آ تینا کلہو اٹی کرے۔ وزیر مملکت پارے کہ پاکستان فیڈرل یونین آف جرنلسٹس (پی ایف یو جے) مبارکباد نا حقدار ئِ کہ او ملک اٹی یوم شہدائے صحافت اڈتننگ کن بے کچ مستحسن گام اس ہرفے، دا محض اسہ دے آخا بلکن ننا دا عزم انا تجدید نا موقع ئِ کہ نن تینا ہمو بہادر ، فرض شناس و سچ انا لگن اٹی جان آن گدرینگوک آتے گیرام کتنے، نن اوفتے سلام و خراج عقیدت پیش کینہ۔ وزیر مملکت پارے کہ بلاشبہ صحافت و سیاست ہڑتوم آ ک ہندن ئُ کسر ئُ ہراڑے کٹھن آزمائش گام گام آ نما نظریہ غاتے تینا کسوٹی ٹی ہلیک۔ اوپارے کہ ای سمجھیوہ کہ حالیت و واقعہ غاتا نزاکت آتا باوجود ننا صحافت ہندن ہی باہمت کڑد آتا بناءغا باوقار و سربلند مسنے، اینو صحافت نا آجوئی نا بہارک و اونا دروشم نا جمال شہید آتا خون انا سوب آن ئِ، یقینا دا اسہ مشکل ئُ کسر اسے ولے اگہ نن غٹ یکجا مرسا معاملہ غاتیا زیات گچین آگہی ، مکالمہ و حکمت و تدبر اٹ مون آ کان تو او بڑزکو وارفع مسخت دوئی کیک ہراننا غٹ انا خواہش و اسہ سنہری ئُ تغ اسے انتئے کہ صحافت و سیاست اسہ ایلو کن لازم و ملزوم ئُ، اسٹ نا نزوری ایلو ئِ ضعیف کیک۔ مریم اورنگزیب پارے کہ ای پی ایف یو جے ئِ دادے انا اڈتننگ آ اسہ وار ولدا مبارکبادی ترسا باوری ایتیوہ کہ حکومت صحافی تا شرحالی ، اوفتا رکھ و اوفتے سازگار چاگڑد نا فراوانی کن تینا کڑد ئِ پین ہم زیات گچین وڑاٹ ادا کیک۔ اوپارے کہ وزیراعظم نا سروکی ٹی حکومت صحافی تا رکھ و اوفتا شرحالی نا بابت پوروی وڑاٹ آگاہ ئِ و ہندا رداٹ جرنلسٹس ویلفیئر و پروٹیکشن نا کانود ئِ وضع کننگ ئِ تانکہ ہندن ئُ ٹھوس بنداو فراوان کننگ مرے ہراٹی صحافی تا شرحالی و اوفتا رکھ انا المی تقاضہ ئِ جوان وڑاٹ پورو کننگ مرے۔
