اسلام آباد۔ 05اپریل (اے پی پی) وزیر واپار خرم دستگیر خان پاکستان و فرانس اٹی واپار نا مون آ دننگ کن کاروباری وارخواہی تا بارواٹی کانفرنس نا اڈتننگ نا سلاہ تسنے و پارینے کہ پاکستان فرانس بزنس کونسل نا ڈل کشاری و انفارمیشن ٹیکنالوجی بشخ آتیٹی زرکاری کننگ اٹی بھاز است خواہی نا درشانی ئِ کرینے۔ اوداہیت ئِ پاکستان فرانس بزنس کونسل نا چیئرمین تھیری فلیمین نا سروکی ٹی اوڑدہی کروک آ ڈل اتون ہیت وگپ اٹی کرے۔ اوڈل انا خیرمقدم ئِ کرے۔ داوخت آ ہیت وگپ کرسا اوپارے کہ پاکستان نا واپاری مارکیٹ بھلو کچ اسے آ تالان مسنے و داوڑ داڑے کٹیا کروک زرکاری نا بے پنا ہ وارخواہی ارے۔ بنجائی وزیر ڈل ئِ سلاہ تس کہ پاکستان اٹی ای کامرس ، انفارمیشن ٹیکنالوجی ، لاجسٹکس و انفراسٹرکچر نا بشخ آتیٹی زرکاری نا بھلو گنجائش اسے۔ خرم دستگیر خان پاکستان فرانس کاروباری وارخواہی بارواٹی کانفرنس نا اڈتننگ نا سلاہ ہم پیش کرے تانکہ پاکستان و فرانس نا نیام اٹ بزنس ٹو بزنس بالمشافہ تین پہ تینی رابطہ غاتے المی جوڑ کننگ مرے۔ اوپارے کہ جی ایس پی پلس نا سوب یورپی یونین کن پاکستان نا برآمد آک ودکی نا رجحان ئِ پاش کننگ ئُ و ساڑی آ سال تیٹی یورپی یونین کن پاکستان نا برآمد آتیٹی بھاز ودکی مسنے۔ اوڑدہی ٹی تھیری فلیمین جم و جوش اٹ خیرمقدم و پبی میزبانی آ وزیر واپار نا ستائِ کرے و پارے کہ ڈل پاکستان نا کشاری و آئی ٹی بشخ اٹی زرکاری نا خواہندار ئِ۔ اوپارے کہ ڈل وزیر نا ہڑتوم آ ملک آتیٹی واپار و برآمد آتے ودفنگ نا بارواٹی تجاویز آ مثبت سجفک ۔
