صدر مملکت ممنون حسین نا لاہور اٹی فوجی ورناتیا جلہو نا مذمت، زہمی خاہوت آتون ہمدردی نا درشانی

دہشت گرد آتا عزم ئِ بے سہب جوڑ کننگ کن کل قوم یکجائِ
اسلام آباد۔ 05اپریل (اے پی پی) صدر مملکت ممنون حسین لاہور اٹی فوجی ورناتیا جلہو نا ترندی اٹ مذمت ئِ کرسا پارینے کہ سیکورٹی فورس و کل قوم دہشت گرد آتا بہادری اٹ مقابلہ ئِ کرینو و اوفتا عزم ئِ بے سہب جوڑ کننگ کن کل قوم یکجائِ۔ چارشنبے نا دے اسہ بیان اسے ٹی صدر مملکت زہمی خاہوت آتون ہمدردی نا درشانی ئِ کرسا صوبائی حکومت و تعلقدار کمامدار آتے ٹھپی تا درمان کن غٹ وسیلہ غاتے کاریم اٹ اتنگ نا پارت کرے۔ او پارے کہ آپریشن ردالفساد نا رداٹ دہشت گرد آتا برخلاف کارروائیک برجائُ۔ اوسیکورٹی ادارہ غاتے پارت کرے کہ دہشت گرد و اوفتا کمکار آتا برخلاف آپریشن اٹی ترندی اتنگے تانکہ دہشت گرد زوت انجام اسکان سرمریر۔ صدر مملکت پارے کہ دہشت گرد آک آخریکو دم تے ہلنگ ئُ۔ اوپارے کہ ننا فوجی ورناک داکان مست ہم دہشت گردی نا برخلاف بے شمار قربانی تسنوو ای اوفتے باوری ایتیوہ کہ اوفتا دا قربانیک گم مفسہ۔ او تعلقدار ادارہ غاتے پارت کرے کہ مردم شماری تون اوار غٹ قومی ڈٹ آتے بروخت پورو کننگ کن غٹ وسیلہ غاتے کاریم اٹ اتنگے و دا ڈٹ آتا کسر اٹی اڑاند جوڑ مروک آ عنصر آتے سختی اٹ دسنگے۔ صدر مملکت شکست اٹی شہیدو ٹھپی مروک آ بے گناہ بندغ آتا خاہوت آتون ہمدردی ظاہر کرے۔