لاہور اٹی مردم شماری نا عملہ ئِ دروک آ ہائی ایس وین اٹی زورداردھماکہ، 5 بندغ شہید، 19 ٹھپی

ٹھپی تے جنرل ہسپتال و سی ایم ایچ لاہور آ گدریفنگا
کمشنر لاہور ڈویژن ، صوبائی وزیر جان جوڑی و ایلو بڑزکو حکومتی عہدیدار آتا ہسپتال آتا دورہ، ٹھپی تا جان پڑسی ئِ کریر
لاہور۔ 05 اپریل (اے پی پی) صوبائی دارالحکومت لاہور نا علاقہ بیدیاں روڈ آ مردم شماری نا عملہ ئِ دروک آ اِرا ہائی ویس وین، ہرافتے ٹی فوجی ورنا و ایلو عملہ نا بندغ آک سوار ئسر، ٹی اناگت زورداردھماکہ ٹی پنچ بندغ شہید وخت اس کہ 19 بندغ ٹھپی مسر، دھماکہ ہنداخہ ترند ئس کہ ایب و کیب نا ماڑی تا شیشہ غاک ہم پنار، دھماکہ نا دمدستی پد امدادی ٹیمک موقع غا رسینگار و امدادی کارروائی کرسا 9 ٹھپی تے جنرل ہسپتال لاہور وخت اس کہ 7 ٹھپی تے سی ایم ایچ آ گدریفنگا۔ دہشت گردی نا واقعہ ٹی شہید مروک آ میت آتے ہسپتال آ سرکننگا۔ دھماکہ نا دمدستی پد جنرل ہسپتال لاہور تون اوار ایلو ہسپتال آتیٹی ایمرجنسی نافذ کننگا و ڈاکٹر آتون اوار غٹ پیرامیڈیکل اسٹاف ئِ ڈیوٹی آ دمدستی سرمننگ نا پارت کننگا۔ جنرل ہسپتال لاہور اٹی اتوک آ ٹھپی تیان اِرا بندغ نا حالیت نازرک وخت اس کہ 7 نا حالیت خلیس آن پیشن پاننگ انگ ئِ وخت اس کہ سی ایم ایچ لاہور اٹی اتوک آ ہفت ٹھپی تا حالیت ہم خلیس آن پیش پاننگ انگ ئِ ، واقعہ غان پد کمشنر لاہور ڈویژن عبداللہ خان سنبل، صوبائی وزیر جان جوڑی عمران نذیر و ایلو بڑزکو حکومتی عہدیدار آک حادثہ نا جاگہ و ہسپتال آتا دورہ ئِ ہم کریر و ہموڑے بنائی جاست وپاست کن یکجا کروک آ شاہدی تا جاچ ئِ ہلکر و ہسپتال آتیٹی ٹھپی تا جان پڑسی ئِ ہم کریر، کمشنر لاہور ڈویژن دہشت گردی نا واقعہ ٹی چار فوجی ورناتے تون اوار پنچ بندغ نا شہیدی ئِ پک کرے وخت اس کہ 19 بندغ نا ٹھپی مننگ نا پارینے، دہشت گردی نا واقعہ غان پد سیکورٹی ادارہ غاک حادثہ نا جاگہ نا بند کرسا ہموکان شاہدی یکجا کریر وخت اس کہ حادثہ نا جاگہ نا خڑک انا دوکان تے ہم بند کننگ نا پارت کننگا تانکہ حادثہ نا جاگہ نا غٹ شاہدی تے یکجا کننگے، داکان بیدس کورکمانڈر لاہور لیفٹیننٹ جنرل صادق علی سی ایم ایچ نا دورہ ئِ کرے و ہموڑے درمان مروک آ ٹھپی تا جان پڑسی ئِ کرے۔