پاکستان ءَ سرمایہ کاری ءِ جوانیں موہ است اِنت، فرانسیسی سرمایہ کار ایشی ءَ چہ نپ چست کُت کناں، حکومت ءُُ سیکورٹی ادارگانی جوانیں گامگیج ءِ سبب ءَ لُکوکیں وھدے ءِ تہ ءَ ناشرکاری ءَ را دست پنجگ کنگ بوتگ
اسلام آباد ۔ 04 اپریل (اے پی پی) صدر مملکت ممنون حسین ءَ گوشت کہ پاکستان ءَ سرمایہ کاری ءِ جوانیں موہ اَست اِنت ایشی ءَ چہ فرانس ءِ سرمایہ کار نپ چست کُت کن آں۔ آئی ءَ اے گپ سئے شمبے ءِ روچ ءَ ایوان ءِ صدر ءَ پاکستان فرانس بزنس کونسل ءِ چیئرمین تھائر ے فلم لین ءِ سرؤکی ءَ فرانسیسی ٹولی ءَ گوں گند ءُُ نند ءِ ساھت ءَ کُت اَنت۔ اے موہ ءِ سر ءَ فرانس ءِ سفیر، ٹوھیں کارندہ ءُُ فرانس ءِ 16مزنیں سرمایہ کار کمپنی آنی نمائندگ ھوار اَتنت۔ صدر ءِ مملکت ءَ گوشت کہ ناشرکاری ءَ پاکستان ءَ را سک باز تاوان داتگ بلے نوں جاور ھال جوانتر اَنت۔ آئی ءَ گوشت کہ حکومت ءُُ سیکورٹی فورسز آنی سبب ءَ نوں اے سلئیں ھوپ ءَ را سندگ ءُُ گستا کنگ بوتگ۔ آئی ءَ گوشت کہ پاکستان ءِ اقتصادی باندات جوان ءُُ دُگنیا ءِ سرمایہ کار پاکستان ءِ نیمگ ءَ دلگوشی کنگ ءَ اَنت چیا کہ پاکستان یک مزنیں مارکیٹ اِت ءُُ اِدا سرمایہ کنگ ءِ ھاترا جوانیں ءُُ الکاپیں موہ است۔ صدر ءِ مملکت ءَ گوشت کہ پاک چین اقتصادی راہداری ءَ اے پڑ ءَ پہ اژدیائیں موہ تالان کتگ۔ اے سرجمیں پڑ ءَ دیمروئی ءِ نوکیں راھ پچ بوھگ ءَ اِنت، پاک چین اقتصادی راہداری منصوبگ ءِ نپ ءُُ سیت ءَ را دیم ءَ ایر کنان ءَ بازیں ملک آں اے منصوبگ ءَ ھوار بوھگ ءِ واستہ دل وشی سُہرا کتگ۔ صدر ءِ مملکت ءَ گوشت کہ فرانسیسی بزنس کونسل ءِ ٹولہ ءَ چہ دوئیں ملک آناں نپ ءُُ سیت رسیت۔ آئی ءَ گوشت کہ پ]اکاتان ءَ انرجی، کشت ءُُ کشاری، ڈیری انڈسٹری ءُُ انفراسٹرکچر ءِ شوبگ آنی تہ ءَ سرمایہ کاری ءِ ھاترا سک باز موہ اَست۔ آئی ءَ گوشت کہ فرانسیسی سرمایہ کار آپی ھاٹیگ ءِ رد ءَ ٹیکنالوجی ءُُ سرمایہ کاری کُت کناں۔ صدر ءِ مملکت ءَ گوشت کہ پاکتان شیر پیداک کنوکیں دُگنیا ءِ چارمی مستریں ملک اِنتءُُ اے شوبگ ءَ پاکستان فرانسیسی کلانہ، ٹیکنالوجی ءُُ سرمایہ کاری ءَ را وش اتک کن اَنت۔ اے موہ ءِ سر ءَ پاکتان فارانس بزنس کونسل ءِ چیئرمین تھائرے فلم لین ءَ صدر ءِ مملکت ءَ را گوشت کہ فرنس کمپنی ءُُ ادارگ پاکستان ءَ سرمایہ کاری ءِ واھشت مند اَنت۔ آئی ءَ گوشت کہ پاکستان ءِ معشیت پڑ ءِ ھاترا سک باز ارزشستی اِنت ءُُ اے سرمایہ کاری ءُُ انفراسٹرکچر ءِ رد ءَ جوانتریں ملک اِنت، آئی ءَ سرمایہ کاری ءِ رد ءَ پاکستان ءِ لبرل ءُُ چیلک کیگیں پالیشی آنی توسیپ کُت۔
