اسلام آباد۔ 02 اپریل (اے پی پی) بی آئی ایس پی 13لکھ نیزگار چناتا پرائمری اسکول آتیٹی اندراج کرینے وجون 2017 ءاسکان 16لکھ چناتا اندراج نا ہدف تخک۔ داخیال آتا درشانی ئِ وزیر مملکت و چیئرپرسن بی آئی ایس پی ماروی میمن یک شنبے نا دے وسیلہ تعلیم پروگرام نا رداٹ اسکول آتیٹی چناتا ملک گیر اندراج مہم نا راولپنڈی آن بناءٹی کرے۔ چناتا اسکول آتیٹی اندراج نا دا ارٹ میکو مرحلہ ئِ و بی آئی ایس پی دا مرحلہ ٹی وسیلہ تعلیم نا سرسہبی ئِ سوگو کننگ نا خواہش مند ئِ۔ WeT نا بناءاکتوبر 2012 ٹی پنچ ضلع غاتیٹی مس ہراداسہ 32ضلع غاتیٹی کاریم کننگ ئِ و جون 2018 نا ایسری اسکان 50 ضلع غاتیٹی تالان کننگک۔ بناءٹی ، چیئرپرسن بی آئی ایس پی رجسٹریشن کیمپ انا غٹ مسہ مرحلہ غاتا معائنہ ئِ کرے۔ غٹ آن مست، حقدار آتا چناتا اسکریننگ کننگک۔ داکان پد تعلیم نا اہمیت آ آگاہی نا سیشن و ولدا بی آئی ایس پی آن مستفید مننگ کن حاضری نا شرط ئِ ہُننگک ۔ ایسر اٹی چناتا اندراج نا عمل ئِ پورو کننگک۔ داوخت آ چیئرپرسن پارے کہ پاکستان اٹی وسیلہ تعلیم نا غٹ 32 ضلع غاتیٹی داوڑنا رجسٹریشن کیمپ اڈ تننگک و دا مرحلہ ہمووخت اسکان برجاسلک ہراوخت اسکان 5-12 سال نا وئی نا غٹ چناتا پرائمری اسکول آتیٹی اندراج مفک۔ اووسیلہ تعلیم ٹیم ئِ پارت تس کہ او کم از کم وخت اٹی غٹ ضلع غاتیٹی اندراج نا عمل ئِ پورو کیر۔
