اسلام آباد۔ 02اپریل (اے پی پی) قومی احتساب بیورو(نیب) انا چیئرمین قمر زمان چوہدری پارینے کہ بدعنوانی نا چٹفنگ نیب انا اولیت ئِ، بدعنوانی نا مون ئِ توننگ اٹی نیب انا فعال اینٹی کرپشن سٹریٹجی سرسہبی مس ، نیب چائنہ پاکستان اکنامک کوریڈور پروجیکٹ آتا چاروکی و شفافیت ئِ المی جوڑ کننگ کن چین اتون مفاہمت نا یات داشت آتیا دستخط کرے، مچ آ ملک اٹی کرپشن نا چٹفنگ کن زیروٹالرنس پالیسی اختیار کرسا تینا قومی فرض انا ادائیگی کوشست آتے ترند کرینے۔ یک شنبے نا دے داڑے جاری بیان اسے ٹی اوپارے کہ ساڑی حکومت نا دور اٹی نیب بدعنوان عنصر آتا برخلاف تعلقدار احتساب عدالت آتیٹی کرپشن ، ریفرنس دائر کرے و بیرہ دونیم سال انا وخت اٹی 45ارب روپئی وصول کرے ہرا نیب انا نمان سرسہبی اسے۔ اوپارے کہ گدرینگوک آ16سال اٹی بندغ، نجی و سرکاری ادارہ غاتیان بابت مسہ لکھ 38 ہزار 499 غاو رسینگا ہرافتے کانود نا رداٹ چٹفنگا۔ داچرجوئی ٹی نیب 11442غاو تے پک، 7528انکوائری و 3810انویسٹی گیشن کرے، تعلقدار احتساب عدالت آتیٹی 2761کرپشن ریفرنس دائر کرے، سزانا جم اٹنگا تناسب 76درسد مس۔ اوپارے کہ نیب 287.415ارب روپئی بدعنوان عنصرآتیان وصول کرے و اوفتے قومی خزانہ ٹی جمع کرفے۔ نیب انسداد بدعنوانی نا بھلو قومی ادارہ اسے ہرادے ملک آن کرپشن نا چٹفنگ نا زمواری تننگانے۔ اوپارے کہ ساڑی انتظامیہ نا دور اٹی نیب انا علاقائی دفتر آتا کچ 5آن ودسا 8 مسنے تاکہ بدعنوانی نا بابت خلقت نا غاوتے مر کننگ مرے۔ اوپارے کہ عملہ نا کاختی نا مون ئِ توننگ کن نیب میرٹ آ این ٹی ایس نا کمک اٹ بی ایس 16آن بی ایس 18 نا 104افسر آتے بھرتی کرے و اسہ اومیت دار اس ہم کانودی فورم آ اسہ تقرری اسے ہم چیلنج کتنے ہرا نیب انا ساڑی انتظامیہ نا شفافیت و میرٹ نا مظہر ئِ۔
