اسلام آباد۔ 02اپریل (اے پی پی) پاکستان اٹی رہینگوک رجسٹرڈ اوغان مہاجر آتا وطن آ پدی ہِننگ نا اینو (دوشنبے نا دے آن )دُوارہ بناءمریک۔ پدی ہنوک آ رجسٹرڈ اوغان مہاجر آتے 200 ڈالر فی بندغ تننکگ۔ جہانی ادارہ برائے پناہ گزین (یواین ایچ سی آر) پدی ہنوک آ اوغان مہاجر آتے کن اِرا بنجا اڈتسنے، داوخت اسکان خیبر پختونخوا آن 16ہزار رجسٹرڈ اوغان مہاجر رجسٹریشن کرفینو۔ یک شنبے نا دے یو این ایچ سی آر نا میڈیا ڈائریکٹر دونیا اسلم اے پی پی تون ہیت وگپ کرسا پارے کہ یخ انا موسم نا سوب رجسٹرڈ اوغان مہاجر آتا پدی ہِننگ نا عمل نومبر 2016ءآ معطل کننگاسس، یخ انا موسم نا ایسری آن پد رجسٹرڈ اوغان مہاجر آتا پدی ہِننگ نا عمل اینو(دوشنبے نا دے آن) دُوارہ بناءکننگ انگ ئِ۔ پدی ہنوک آ رجسٹرڈ اوغان مہاجر آتے کن کوئٹہ(بلیلی) وخت اس کہ ایلو چمکنی خیبر پختونخوا ٹی اڈتننگانے۔ اوپارے کہ خیبر پختونخوا، پنجاب، گلگت بلتستان اٹی رہینگوک آ 16ہزار رجسٹرڈ اوغان مہاجر پدی ہِننگ کن رجسٹریشن کرفینو ہرافتے اپریل آن مئی اسکان پدی گدریفنگک۔ دونیا اسلم پارے کہ جہانی کہول آ مہاجر آتا زور انا سوب آن فنڈ اٹی کمتی نا سوب اینخو سال پدی ہنوک آ رجسٹرڈ اوغان مہاجر آتے 200 ڈالر فی بندغ تننگک وخت اس کہ گدرینگوک آ سال پدی ہنوک آ مہاجر آتے 400 ڈالر تننگاسس، جہانی کہول آ فنڈنگ اٹی کمتی نا سوب پدی ہنوک آ مہاجر آتے ملوک آ امداد کم کننگانے ، دونیا اسلم پارے کہ پنچ سال آن کم وئی چناتا رجسٹریشن ، پوسکن ودی مروک آ چناتا رجسٹریشن ، ودی مننگ نا سرٹیفیکٹ نا عمل برجاسلک۔ رجسٹرڈ اوغان مہاجر ہر خواری آن بچنگ کن پنچ سال آن کم وئی چناتا رجسٹریشن ئِ یو این ایچ سی آر نا تخوک آ پی سی این سینٹر پشاور، کراچی، کوئٹہ، اسلام آبادو راولپنڈی ٹی کرفنگ کیرہ۔ تانکہ وطن آ پدی ہِننگ نا وخت آ رجسٹرڈ چناتے ہم 200 ڈالر مالی امداد تننگ مرے۔
