اسلام آباد۔ 01اپریل (اے پی پی) فاٹا ٹی آپریشن ضرب عضب آن زہمی مروک آ عارضی وڑاٹ بے اُرا بندغ آتا پدی ہِننگ نا چارمیکو و آخریکو مرحلہ جاری ئِ۔ قطبی وزیرستان نا بے اُرا بندغ آتا 90 درسد پدی پورو مسنے۔ فاٹا ٹی روڈ آتا و توانائی نا تحالی کن کاریم برجائِ۔ ہفتہ نا دے قطبی وزیرستان نا کوآرڈینیٹرعزیز داوڑ اے پی پی تون ہیت وگپ کرسا پارے کہ فاٹا ٹی دہشت گردآتا برخلاف آپریشن اٹی زہمی مروک آ عارضی وڑاٹ بے اُرا بندغ آتا پدی ہِننگ نا چارمیکو و آخریکو مرحلہ برجائِ ہرا رواں تُو انا ایسر اسکان برجاسلک۔ ولے قطبی وزیرستان نا داوخت اسکان 90 درسد عارضی وڑاٹ بے اُرا بندغ آتا پدی ہِننگ پورو مسنے۔ اوپارے کہ ایلو دہ درسد سلوک آ عارضی وڑاٹ بے اُرا بندغ آتا پدی رواں تُو انا ایسر اسکان پورو کننگک۔ بے اُرا بندغ آتے پدی تینا علاقہ غاتیٹی ہِننگ کن سیکورٹی فورس آتا کنڈآن اڈ تروک چیک پوسٹ آ وطن کارڈ نشان تننگ المی ئِ داڑآن بیدس اسہ بندغ اسے ہم گدرینگ انگ نا موکل اف۔ عزیز داوڑ پارے کہ سیکورٹی فورس آتا کنڈآن وطن کارڈ ہنداخاطران المی گوندنگانے کہ پین اسہ بندغ اس ہم ہِننگ کپ ہرا علاقہ نا امن و ایمنی و بے اُرا بندغ آتے کن ویل اس ودی کننگ کپ۔اوپارے کہ عارضی وڑاٹ بے اُرا بندغ آتا ہند آتا سروے جاری ئِ ولے سروے پورو کننگ آ پورو بھس مروک آ اُرا نا معاوضہ چار لکھ روپئی وخت اس کہ جزوی وڑاٹ زہمی مروک آ اُرا نا معاوضہ اسہ لکھ شست ہزار روپئی ادا کننگ انگ ئِ۔ اوپارے کہ آپریشن نا سوب روڈ و بجلی تے ہم نسخان رسینگانے ہرافتے سہی کننگ انگ ئِ۔ عزیز داوڑ پارے کہ فاٹا ٹی مواصلات نا نظام نا بحالی ٹی گڑاس وخت لگک ولے بحالی و پوسکن جوڑ جاڑ نا ڈٹ آتیا ترندی اٹ کاریم برجائِ۔
