اسلام آباد۔ 01 اپریل (اے پی پی) ڈپٹی اسپیکر قومی اسمبلی مرتضیٰ جاوید عباسی پارینے کہ پسماندگی نا چٹفنگ و الس ئِ اوفتا درگہ غا بنداوی آسراتی تا فراوانی مسلم لیگ (ن) نا حکومت نا اولیت آتیٹی اوار ئِ و دا مسخت نا دوئی کن جنگی بنداو تیا گام گیج کننگ انگ ئِ۔ وزیراعظم محمد نواز شریف نا سروکی ٹی مسلم لیگ (ن) نا حکومت نا گچین پالیسی تا سوب ملک شونداری نا کسرآ روان مسنے و گدرینگوک آ مسہ نیم سال اٹی دہشت گردی نا عفریت و توانائی نا کمتی کون آ ویل آتا مون ئِ توننگ تون اوار اوار مچ آ ملک اٹی چندی بھلو شونداری ڈٹ آتا بناءکننگانے ہرافتا پوروی آن شونہالی نا پوسکن آ دور انا بناءمریک۔ او داخیال آتا درشانی ئِ ہفتہ نادے راولپنڈی ٹی اسہ بھلو مچی اسے آن تران کرسا کرے ہراٹی ویلج کونسل تاجوال ، ویلج کونسل سیر شرقی، ویلج کونسل نوشہرہ نا السی نمائندہ و سرکڑدہ غاتیان بیدس راولپنڈی اسلام آباد اٹی رہینگوک ویلج کونسل تاجوال سیر شرقی ، نوشہرہ و NA-18 نا ایلو علاقہ غاتیان تعلق تخوک آتا بھلو کچ اس ساڑی ئسر۔ ڈپٹی اسپیکر تاجوال آن تعلق تخوک آ مسلم لیگ (ن) نا بلدیاتی نمائندہ و کارندہ غاتا علاقہ ٹی مسلم لیگ (ن) ئِ سوگو و منظم جوڑ کننگ کن جہد نا ستائِ کرساپارے کہ ہراڑے قومیت نا پن آ سیاست مرے ہموڑے نظریات نا سیاست کننگ بھلو جیرت نا ہیت اسے۔ اوپارے کہ تاجوال نا مسلم لیگی کارندہ غاک مخالف آتا داغٹ تر انتقامی کارروائی تا باوجود ثابت گامی نا درشانی ئِ کرینو۔ اوپارے کہ او الس ناخذمت آ یخین تخرہ و او ہمیشہ جندی مفاد آتیان ایڑتر مرسا سیاست کرینے۔
