ٹیکسلا۔ 31مارچ (اے پی پی) وزیر داخلہ چوہدری نثارعلی خان پارینے کہ عزت کڑد آن مریک عہدہ غان آخا، ٹیکسلا نا گچین مروک آ نمائندہ مفننگ نا باوجود گدرینگوک آ مسہ سال اٹی ارب آ روپئی نا شونداری کاریم کرفین۔ گچین مروک آ نمائندہ پیپلزپارٹی آن ہلیس ق لیگ اسکان و ولدا جنرل مشرف آن ہلیس پی ٹی آئی اسکان پارٹی بدلیفنگ نا ریکارڈ قائم کریر۔ جمعہ نا دے داڑے ٹیکسلا ٹی گچین مروک آ نمائندہ، علاقہ نا معزز و ہندی راہشون آتیان تران کرسا وزیر داخلہ پارے کہ ٹیکسلا اسہ تاریخی ئُ شار اسے اونا گچین مروک نمائندہ باعزت و باکڑد ار بایدے مرے و علاقہ کن بدنامی و جگ ہنسانی نا سوب جوڑ مف۔ وزیر داخلہ پارے کہ واہ ٹی اسہ بھلو ہسپتال اسے نا اڈتننگ تون اوار اوار ریسکیو 1122 و پوسکن آ اسکول آتا اجرا مچ آ علاقہ کن باعث است جم و راحت مریک۔ پی او ایف نا ملازم آتا ویل آتا ذکر ئِ کرسا وزیر داخلہ پارے کہ میاں محمد نواز شریف نا او اسٹ انگا حکومت ئِ ہرا1999 ءٹی ہم پی او ایف کن اسپیشل پیکج نا پڑو کرے اسہ وار ولدا پی او ایف نا ملازم آتے اسہ تاریخی ئُ پیکج اس تس ہرا بدقسمتی اٹ پی او ایف انتظامیہ نا نابودی و بد نظمی نا سوب تعطل نا گواچی مسنے ولے انشاءاللہ اودے ہر حالیت اٹی بحال کننگک و پی او ایف نا اسہ اسہ مزور اوڑآن فائدہ ہرفک۔ وزیر داخلہ ٹیکسلا ٹی چندی بلدیاتی کمیٹیز آتا ہم پڑو ئِ کرے ہرا کرپشن نا توننگ ، شونداری کاریم تے ودفنگ و حلقہ نا الس تون خڑکی تعلق تخنگ اٹی کمک و کمکار جوڑ مریک۔
