اسلام آباد۔ 31مارچ (اے پی پی) صدر مملکت ممنون حسین پارینے کہ آپریشن ضرب عضب ، ردالفساد و دہشت گردی نا برخلاف کارروائی تیان پولیو نا مون ئِ توننگ اٹی کمک رسینگانے و وزیراعظم جان جوڑی ئِ گچین جوڑ کننگ کن بے کچ اہم گام گیج کرینے ہرافتا گچین نتیجہ مون آ بننگ ئِ۔ اوداہیت ئِ جمعہ نا دے ایوان صدر اٹی جہانی ادارہ جان جوڑی (ڈبلیو ایچ او) نا ریجنل ڈائریکٹر ڈاکٹر محمد فکری تون اوڑدہی ٹی پارے ہراٹی وزیر مملکت جان جوڑی سائرہ افضل تارڑ و ایلو بڑزکو کمامدارآک ہم ساڑی ئسر۔ صدر مملکت پارے کہ دہشت گردی نا چٹفنگ آن پولیو نا مون ئِ توننگ اٹی کمک رسینگانے۔ اوپارے کہ جان جوڑی کون آ بنداوی آسراتی تا فراوانی کن وزیراعظم نا سروکی ٹی حکومت اہم گام گیج کننگ ئِ۔ صدر مملکت پارے کہ وزیر مملکت سائرہ افضل تارڑ جان جوڑی عامہ نا بابت وزیراعظم نا وژن آ بھاز خواری اٹ کاریم کرے۔ او ورلڈ ہیلتھ آرگنائزیشن نا کنڈآن جان جوڑی نا بشخ اٹی پاکستان تون کمک نا ستائِ کرسا پارے کہ دانا نتیجہ ٹی پاکستان اٹی ناجوڑی تا توننگ و جان جوڑی عامہ نا ویل آتا مون ئِ توننگ اٹی کمک رسینگک۔ اواومیت ظاہر کرے کہ ڈبلیو ایچ او نا کنڈآن دا کمکاری آخبت اٹی ہم برجاسلک۔ صدر مملکت پارے کہ حکومت پاکستان پولیو تون اوار غٹ خراب انگا مرض آتا چٹفنگ کن یکسوئِ و داڑکن غٹ وسیلہ غاتے کاریم اٹ اتنگ ئِ ۔ داوخت آ ڈبلیو ایچ او نا ریجنل ڈائریکٹر ڈاکٹرمحمد فکری پارے کہ وزیراعظم نا ہیلتھ کارڈ اسکیم جان جوڑی عامہ نا چرجوئی ٹی بھاز فائدہ مند جوڑ مریک و داڑآن لس بندغ ئِ درمان اٹی کمک رسینگک۔ اوپارے کہ جان جوڑی عامہ نا آسراتی تے لس کننگ کن حکومت پاکستان ڈبلیو ایچ او نا کمک دوئی مریک۔
