اسلام آباد۔ 31مارچ (اے پی پی) مسکوہی سفیر شاہد ملک نا پاننگ ئِ کہ جہانی برادری ئِ بایدے مرے کہ او کشمیر نا ویل ئِ ایسر کرفنگ کن بھارت آ زور شاغے ۔ ریڈیو پاکستان تون ہیت وگپ کرسا اوپارے کہ جہانی برادری کشمیر نا ویل آ باہ ئِ سرفنگ آن بیدس ہچ اس کپک ۔ اودے بایدے مرے کہ او مقبوضہ کشمیر اٹی مروک آ بیدادی نا کنڈآ چکار کے و کشمیر نا ویل ئِ ایسر کرفنگ کن بھارت آ زور شاغے۔ اوپارے کہ دنیا تو تینا فائدہ غاتے ہرسا ویل آتا برخلاف ہیت کیک وو اگہ ہیت اس مسلمان تا برخلاف مرے تو اوڑآ چپی اختیار کیک۔ شاہد ملک پارے کہ ننے بایدے مرے کہ نن تینا سنگت ملک چین انا کمک اٹ داویل ئِ ایسر کرفنگ نا کوشست کین۔ اوپارے کہ مقبوضہ کشمیر اٹی مروک آ بھارتی بیدادی ئِ سوشل میڈیا و ذرائع ابلاغ نا کمک اٹ تالان کننگ نا گرج ئِ تانکہ مچ آ دنیا ٹی بھارت نا دوہرا معیار ئِ پاش کننگ مرے۔
