ملک آن ہردروشم دہشت گردی نا ناسور نا چٹفنگ اٹی پرعزم اُن، تینا گل زمین آن دہشت گردی نا پورو چٹفنگ اسکان جنگ ئِ برجاتخنگ ننا قومی زمواری ئِ ، وزیراعظم محمد نواز شریف نا بیان
اسلام آباد۔ 31مارچ (اے پی پی) وزیراعظم محمد نواز شریف پارہ چنار اٹی مروک آ بمب دھماکہ نا ترندی اٹ مذمت ئِ کرینے ہراٹی کیہی نہادی جان تا زیان و چندی بندغ آک ٹھپی مسنو۔ جمعہ نا دے وزیراعظم نا کنڈآن جاری بیان اسے نا رداٹ وزیراعظم حادثہ ٹی تپاخت کروک آتا خاہوت تون ہمدردی و ہڑزخواہی نا درشانی ئِ کرے و دعا کرے کہ اللہ تعالیٰ ایماندار تے جنت الفردوس اٹی جاگہ ایتے۔ اوٹھپی تا زوت جان جوڑی کن دعاہم کرے۔ وزیراعظم حکومت نا ملک آن ہر دروشم دہشت گردی نا ناسور نا چٹفنگ نا عزم انا اعادہ ئِ کرے۔ اوپارے کہ دہشت گرد آتا نیٹ ورک ئِ پرغنگانے و تینا گل زمین آن دہشت گردی نا پوروی اٹ چٹفنگ اسکان جنگ ئِ برجاتخنگ ننا قومی زمواری ئِ۔ وزیراعظم تعلقدار کمامدار آتے پارت کرے کہ ہندی انتظامیہ نا ہروڑ کمک ئِ کننگے۔
