اسلام آباد۔ 30مارچ (اے پی پی) وزیر مملکت نیشنل ہیلتھ سروسز سائرہ افضل تارڑ پارینے کہ وزیراعظم نواز شریف نا سروکی ٹی بناءکروک آ قومی جان جوڑی نا بارواٹی تاریخی پروگرام نا رداٹ داوخت اسکان دہ لکھ خاہوت آتے ہیلتھ انشورنس کوریج تسونن و وزیراعظم محمد نواز شریف نا سروکی ٹی بناءکروک آ قومی جان جوڑی نا پروگرام نیزگاری نا لکیر آن شیف زند ئِ تدیفوک آ زیات آن زیات خاہوت آتسکان ترندی اٹ سرمننگ ئِ۔ او وزیراعظم نا قومی جان جوڑی نا پروگرام نا قومی راہشون کمیٹی نا 15می دیوان آن تران کریکہ۔ دیوان اٹی سیکرٹری وزارت نیشنل ہیلتھ سروسز، ڈائریکٹر جنرل وزارت قومی جان جوڑی وزیراعظم نا دفتر آن نمائندہ صوبائی جان جوڑی نا محکمہ ، خزانہ ، کانود و ڈٹ بندی نا وزارت ، اسٹیٹ لائف انشورنس کارپوریشن ، نادرا و شریدار ادارہ غاتا نمائندہ غاک ساڑی ئسر۔ دیوان وزیراعظم نا پارت آتا روشنی ٹی نیشنل ہیلتھ انشورنس پروگرام سندھ و خیبر پختونخوا ٹی بناءکننگ نا بارواٹی المی فیصلہ کننگ کن بٹنگ انگاسس۔ داہڑتوم آ صوبہ غاتیٹی پروگرام بنجائی حکومت نا 100 درسد زرآن بناءکیک ودکی شدہ پروگرام مچ آ پاکستان اٹی نیزگاری نا لکیر آن شیف زند ئِ تدیفوک آ ہمون انگا بندغ آتے جان جوڑی نا ثانوی و ایلو آسراتی مفت فراوان کیک ہرافتا کٹیا 200 روپئی یو میہ آن ہم کم مرے۔ وزیراعظم نا قومی جان جوڑی نا دا پروگرام بنائی وڑاٹ پاکستان نا 23 ضلع غاتیٹی بناءکننگاسس دا پروگرام ئِ داسہ 60 ضلع غاتسکان ودفنگ انگ ئِ و داودکی ٹی فاٹا نا 11 ضلع، اے جے کے نا 10 ضلع، گلگت بلتستان نا 7 ضلع، پنجاب نا 11 ضلع، بلوچستان نا 12ضلع ، سندھ و خیبر پختونخوا ٓن ہر اسٹ نا چار چار ضلع و آئی سی ٹی ئِ اوار کننگانے و دا ودکی آن ہیلتھ انشورنس نا دا پروگرام اٹی 30 لکھ خاہوت آتے فائدہ رسینگک۔ وزیر دیوان اٹی پارے کہ پروگرام نا رداٹ پینل آ ساڑی 81 ہسپتال آتیٹی 17000 مریض آتے درمان کن داخل کننگا و اندراج شدہ ہزار آ مریض آتا غٹ آن گچین پرائیویٹ و سرکاری ہسپتال آتیٹی سرسہب درمان مسنے۔
